Bandièra01 1180x150: Comuna de Tolosa

Actualitats

Nuèch de fuòc en Occitània tota

La fèsta de Sant Joan se ten aquesta dimenjada al país amb mai de vam que jamai

| Zep Armentano
La fèsta tradicionala del fuòc en Occitània patís cada annada l'empediment que lo jorn de Sant Joan siá un jorn obrant (es solament fèsta en Aran), e mai en França arriba just après la Fèsta de la Musica. Mas ongan, gràcias al fach que Sant Joan siá dimenge, a la determinacion de cèrts sectors occitanistas e a la reconeissença de l'UNÈSCO de las fèstas de fuòc en Aran e Comenge, anuèch lo fuòc serà tornarmai lo protagonista en Occitània tota.
 
 
Patrimòni de l'UNÈSCO en Aran e Comenge
 
En Aran e Comenge, la fèsta pren un vam especial tres ans après que l’UNÈCO reconeguèt coma patrimòni immaterial de l'umanitat las “fèstas del fuòc del solstici d’estiu dels Pirenèus” de 36 comunas d’Occitània (en Comenge e Aran), de 14 de Catalonha, de 9 d’Aragon e de 3 d’Andòrra.
 
Dins fòrça endreches del país, lo fuòc se l’amòrta amb la boca empastada de la Fèsta de la Musica. Mas en Aran la fèsta es fòrça viva, mai que mai a Les e a Arties ont se sèrva la tradicion de cremar eth Haro, o eth Taro, dins la nuèch mai corta de l’an, segon la tradicion.
 
E mai se l’UNÈSCO a catalogadas las fèstas del fuòc jos la meteissa etiqueta, aquestas son fòrça ricas e variadas. Cada vila o vilatge las fa segon sa faiçon ancestrala, e se presentan de biaisses diferents.
 
 
Fèsta d'Occitània a Tolosa
 
E mai ongan volèm soslinhar la Fèsta d'Occitània qu'a luòc a Tolosa e es organizada per l'Ostal d'Occitània. A l'ocasion del Total Festum, i aurà a 21h al Jardin de las Plantas un concèrt balèti amb Test e Goulamas'k.
 
En mai d'aquò, la Flama del Canigó, arribada de Catalonha, alucarà lo fuòc de Sant Joan amb una fèsta occitanocatalana. Durant la jornada, de 10h a 17h, se tendrà un rescontre de sardanistas e a partir de 22h se farà lo concèrt dels catalans Gestrudis e dels occitans Massilia Sound System.






 
 
 
fffff
Era Hèsta deth Huec en Aran
 
Eth Haro, nomentat eth Taro en Arties, ei un tronc d’auet quilhat que serà cremat aguest ser en escadença dera net de Sant Joan.
 
En Les, pendent tot er an que se debanen hèstes populares ar entorn de tot eth procès tà preparar eth Haro: era davalada, era shasclada e era quilhada. Totun, era cremada que se harà anet ei eth moment mès especiau. Dempús dera benediccion deth brandon, e de cantar “aqueres montanhes que tan nautes son”, que s’aluque eth Haro. Ath sòn torn que i baren es halhèrs en tot hèr virar halhes alucades de pèth de ceridèr. Dempús se dance ath torn deth brandon enquia qu’ei completaments cremat. Es dançaires, damb es vestits tradicionaus, que baren rondèus, borrègues, corrandes, gigues e d’autes dances deth país.
 
En Arties, un viatge eth Taro ei alucat, se lo hè quèir ath sòu e se passege per toti es carrèrs deth pòble. Es joeni que sauten per dessús des ahlames. Fin finau, eth brandon se pòrte en çò deth cònsol màger, qui lo deu amortar en tot convidar a béuer ara gent que hestege.
 
Se tracte d’ua tradicion millenària que se cristianizèc, mès damb origines que se placen en ua tradicion celtica. Era legenda que ditz qu’en crear-se eth Mond, un holet nomentat Erulet siguec arrefusat tant en Cèu coma en Lunfèrn pr’amor qu’ère plan marrit. Eth holet demorèc atrapat ena Val d’Aran. Tre aqueth moment es vesins escampen es lacets alucadi deth Haro o deth Taro per carrèrs e camins, e baren ath sòn entorn entà hòrabandir aguest mau esperit.
 
Aquera tradicion qu’ei tanplan fòrça viua en d’auti endrets de Gasconha.
 
 
 
FM





 
fffff




abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Visca Sant Joan !
Visca Occitania tota !
E visca los Paísos fraires Catalans !

  • 6
  • 0
cataloccitá cataloccitania
1.

La feste del foc es una feste cataloccitana, doncs es celebra a tots els PP.CC. e OCCITANIA, per igual.

  • 13
  • 2

Escriu un comentari sus aqueste article