Venèm de viure una dimenjada tretzista particulara amb una novèla distribucion de bloquièrs, de rescontres internacionals, lo segond episòdi dels Estats d’Origina e la mesa a jorn del calendièr de Superliga!

 
 
Limós e los Dragonets se tornaràn trapar a Albi
Dissabte, se jogavan las mièjas finalas del campionat d’Elèit 1. A l’Agulha, Limós se mostrèt mai solidari e mai creatiu que Lesinhan qu’ensagèt de passar per l’opcion “saca de carpans” al segond temps (tres cartons jaunes, un roge mai un roge per l’entraïnaire adjunt!). Fin finala, en ganhant 30-12, los campions aniràn defendre lor trofèu que tenon ja dempuèi dos ans.
 
A Sant Estève, las causas foguèron mai complicadas pels Dragonets fàcia a una valerosa formacion d’Avinhon que menava encara 16-14 a 7 minutas del tèrme, abans de plegar 23-16.
 
La finala se debanarà aqueste dimenge 1r de julh, a 5 oras del vèspre, a l’Estadium d’Albi.
 
En dobertura, se jogarà la finala dels juniors entre Sant Estève-XIII Catalan e Avinhon.
 
 
Una molonada de bloquièrs
 
Aqueste dimenge, se joguèron a Cavalhon las finalas de Federala. En Federala 1, Caumont s’emportèt lo bloquièr fàcia als Audencs de Pomàs: 18-8. En Federala 2, la resèrva de Vilagalhenc-Argon balha un tresen títol al club aprèp la Copa e lo Campionat d’Elèit 2 en s’impausant contra los catalans de Salsas 23-22. Una penalitat sus la còrna balha lo bloquièr dels juniors nacionals a Ille: 38-37 contra Realmont.
 
Lo Tolosa-Ovalia ganha lo campionat femenin 28-14 fàcia a Lion-Villeurbanne.
 
 
Los catalans espèran totjorn…
 
Lo calendièr de la Superliga se metiá a jorn. Dimècres, los Dragons jogavan a Leeds. Menavan 10-0 abans de daissar escapar los Rinocèros: 24-10 a la pausa. En signant tres ensages dins lo segond temps contra un punt sus tombat dels angleses, los Dragons ganhan 28-25 e se tornan plaçar a un punt de l’ueitena plaça.
 
Aqueste dissabte 30 de junh, la recepcion de Castleford es d’una importància bèla per poder esperar de dintrar dins los primièrs uèit. Los Tigres son en fòrma: victòria sus Wigan 19-18.
 
Abans la partida, a miègjorn, los sostens dels Dragons son convidats a prene part a una granda paella.
 
En championship, passejada de santat dels tolosans a Rochdale: 70-14, amb 13 ensages marcats abans un desplaçament cò de las Aglas de Sheffield dimenge e la recepcion de Londres a Blanhac lo dissabte 7 de julh. Doas partidas decisivas per integrar la pola monta-davala amb la Superliga.
 
 
L’annada 2018 es blava!
 
Aqueste dimenge, l’ANZ-Estadium de Sydney èra lo teatre del segond afrontament dels Estats d’Origina. La partida foguèt sarrada e plan disputada e Nòvas Galas del Sud confirmèt sa victòria de Melbourne: 18-14. Ganha atal la tièra 2018. Queensland ensajarà de salvar l’onor lo 11 de julh a Brisbane.
 
 
Los Lions manjan los Kiwis
 
Dins un estadi de Denver de 80 000 plaças, emplenat de 20 000 espectators, los Lions angleses aguèron la victòria suls Kiwis neozelandeses que presentavan una esquipa rejovenida: 36-18. L’implantacion del XIII als Estats Units serà pas un afar simple: es pas ganhat!
 
De son costat, en Austràlia, a Campbelltown, Tònga a ganhat contra Samoa 38-22 e Papoa signa una victòria 26-14 fàcia a Fiji.
 
 
 
Alan Roch