Un deputat del Parlament Europèu ganha un salari de basa de 8484 èuros cada mes. En mai d'aquò, la majoritat percebon entre 12 000 e 14 000 èuros mesadièrs amb d’indemnitats. Se n’i aviá pas pro amb aquò, lo 60% dels eurodeputats fan d'autras activitats e an d'emplecs al marge de l'Eurocambra. L'organizacion Transparéncia Internacionala a publicat un rapòrt entitolat Moonlighting in Brussels: side jobs and ethics concerns in the European Parliament (Trabalh negre a Brussèlas, d'emplecs parallèls e de chepics etics al Parlament Europèu).
 
 
Los eurosceptics e los populars, los que ganhan mai d'argent
 
E mai se lo 31% dels deputats europèus declaran de revenguts d'activitats extraparlamentàrias, aquel percentatge puèja demest los eurosceptics e los populars. Mai del 50% del grop Euròpa de las Nacions e de las Libertats, que ne fa partida lo Recampament National de Marine Le Pen, an de salaris addicionals, mentre que lo 37% dels deputats del Partit Popular Europèu son pagats per d'activitats exterioras a l'Europarlament.
 
 
Trabalhan pels lobbies
 
Segon lo vejaire de Transparéncia Internacionala, d’aver d'emplecs en defòra del Parlament Europèu pòt crear de conflictes d'interèsses entre la representacion politica e las entrepresas.
 
Lo rapòrt denóncia especificament que tres eurodeputats tenon a l'ora d'ara d'activitats pagadas amb d'organizacions listadas dins lo registre de lobbying de l'UE, e mai s'aquò es enebit. Se tracta de la populara Viviane Reding, que fa partida del burèu de la Fondacion Bertelsmann; lo tanben popular Paul Rübig, qu’es un naut responsable de la Cambra de Comèrci Austriana (WKÖ), e de la socialista Aggnes Jongerius, que se tròba dins lo conselh de supervision de PostNL.
 
Segon lo rapòrt, lo 30% dels deputats de la legislatura precedenta qu'an quitat la politica, trabalhan dins d'organizacions registradas coma lobbies per l'UE.

 

60% of the members of the @Europarl_EN have declared outside activities. 31% of MEPs now have paid side jobs. Check out @TI_EU's report "Moonlighting in Brussels: side jobs and ethics concerns in the European Parliament". >> https://t.co/kHOKh8M6uCpic.twitter.com/HK3K7Mzz4C

— Transparency Int'l (@anticorruption) 10 de juliol de 2018