Bandièra01 1180x150: Comuna de Tolosa

Actualitats

Amassada per la lenga e la cultura occitanas en Auvèrnhe

Laurent Wauquiez, president de la Region, a declarat qu’Auvernhe-Ròse-Alps èra “una granda region d’Occitània” e que la lenga i èra enrasigada e a l’encòp “extraordinàriament modèrna”

Lo 9 de julhet a l’Ostal de Region de Clarmont-Ferrand se faguèt “l’Amassada per la lenga e la cultura occitanas en Auvernhe-Ròse-Alps” ont s’acampèron mai de 50 personas que representavan las associacions e institucions occitanas e la region. La jornada se dobriguèt amb un vidèo d’acuèlh de Laurent Wauquiez, president de la region, que declarèt qu’Auvernhe-Ròse-Alps èra “una granda region d’Occitània” e que la lenga i èra enrasigada e a l’encòp “extraordinàriament modèrna”. Anoncièt tanben un programa d’accions avenidoiras, amb de convencions, per desvolopar la lenga dins la region.
 
Seguiguèron las intervencions de François Duval (director de la cultura de la region) e de Gilabèrt Mercadièr (president del Congrès Permanent de la Lenga Occitana).
 
Se passèt puèi d’extraches de dos filmes per far plan veire l’importància e la valor de la transmission per l’ensenhament bilingüe.
 
Bernat Giacomo (CFPO Auvèrnhe) presentèt un panorama complet dels actors e de las realizacions mèstras en region, seguit per las intervencions de Desdièr Huguet (ensenhament public), Marie Barret (federacion regionala Calandreta), Thierry Bousseau (Agéncia Sirventés), Romain Maurel (AMTA), Jean Roux (IEO), Jean-Baptiste Martin (edicions EMCC), Mickaël Neyrolles (IEO Ròse-Alps), Jean-Pierre Bonnet (Universitat de Clarmont).
 
Lo vèspre se trabalhèt en taulas redondas: “Ensenhament e transmission”, “Accion culturala e creacion artistica”, “edicion e difusion”, “socializacion e mèdias”. Los raportaires presentèron per cada obrador de proposicions d’objectius e d’indicadors d’avaloracion. Se publicarà aquestas setmanas un document de sintèsi d’aquela amassada.
 
Enfin, Martine Guibert, vicepresidenta de la region, clavèt la jornada. Los participants e los representants de la region s’acordèron sus la qualitat dels escambis e prepausèron que l’Amassada se faguèsse cada an. Aquel 9 de julhet, que permetèt als actors de la cultura occitana d’escambiar entre eles e amb la region, es doncas una data importanta per la cultura e la lenga dins lo nòrd e l’èst d’Occitània!
 
 
 
 
Lo Congrès Permanent de la Lenga Occitana



 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo raiòu Cevenas
12.

Ideulogias politicas e religiosas son viruses per la fe, aquel fiòc empusat per la legitimitat de tota pulsion de vida, de tota revendicacion sana e positiva. Savèm pro que ne'n manca pas de manipulaires, de messorguièrs dinc aquel mitan de la politicalha. Mès la règla dau jòc nos es empausada despièi bèl briu. Quò fai que joguem emb de las cartas qu'avèm : aitant d'ànjons coma de demònis dals dos costats ! Evidentament, avèm besonh d'aveire fisença e de l'i creire quauque moment : aquò's uman, que podèm pas viure de contunha dinc l'aissitge.

Pasmens, tot aqueste travalh de preparacion entemenat sembla prometós e me fai gaug de o legir.
Una part de mon país cevenòu e de mas racinas raiòlas se tròvon dinc aquesta granda region administrativa. Pense que las part septentrionalas e orientalas d'Occitania son dinc una dinamica bien flàpia per rapòrt a d'autres país d'Òc. Son nòstra Tèrra d'Òc, sans ges de dobtança. Avèm besonh d'aquestas tèrras nordicament miègjornalas (e segurament pas centradas !).
Francament, lurs sovète aquò melhor per las annadas que vènon.

  • 5
  • 0
pas sup
11.

#10 Mas dins tot aquò i a un quicòm que ven atrasent : L'esquerra e la drecha dintran en concurencia acarats a l'occitan, de promessas d'un costat a de promessas de l'autra e sabem çò que ne val de las promessas, mas çaquelà tant pauc que cadun ne fasquessa, los dos faràn benlèu quicòm...amais'es plan mens que las intencions manifestadas e puèi çò que cal pas doblidar : se parla de nosaus, venem un bocin mens anonims.

Nos damòra que de s'engulhar coma partenaris dins de projectes a esquerra e a drecha. los dos trabalhon per la lenga nòstra (pel mens o dison).
Mas cal far mèfi, los meteis mots dison pas las meteissas causas. Ja n'en coneissem l'encastre comun : " Lo francés es la lenga de la republica" cap de problèma per aquò es ara una evidencia...
A nosaus de far bolegar las linhas... e per l'ora avem pas los mejans de rescompassar la linha roge !

Apèi damòra Occitània cossi la volem ?

Dirai que per iò la question se pausa pas vist que sem a qualquas annadas lum de fargar un país dich Occitània.
Aquò empacha pas d'i trabalhar... sul papièr, una mena de jòc d'estiu...

1 Organizacion del territòri
2 Qu'un sitem de govern
3 quantes d'assembladas
4 quantes de deputats o autres
5- cossi sarà finançat (es pas lo mendre)

E subretot lo passatge d'un estat a un autre fransa e occitània. sarà benlèu çò pus reguergue de gerir, caldrà balhar de garantidas sus un nivèl de contunhacion .. aquò rai avem leser, mas es pas inutil d'i perpensar tre ara dins lo detalh e pas dins d'ennairadas dins l'estil plan coneigut que servis a de ren.

Parlar e èsser pas dins lo fangàs, aisit de far
Far en estant dins lo fangàs dificil de far e mai d'aquò te caldrà contentar mond....

Tot aquò es un bon devers de vacanças....

Se recamparàn las copias a la dintrada .... ( me risi)

  • 5
  • 0
Guilhem Pujol Seta
10.

#9 Content de veire que siam plan d'acordi, aquel Wauquiez es pas qu'un messorguièr de mai qu'ensaja d'enstrumentalizar la lenga nostra e que se'n trufa d'a fons. Coma o faguèron abans èl maites politicians de drècha o d'esquèrra. Son sembla-interès per l'occitan es res que d'enfumatge e i-a pas luoc de s'en regausir. Es ben coma aquo que l'ausissiai.

  • 5
  • 0
pas sup
9.

#8 E justament es çò que disiai.... amai fa un brave bocin de temps qu'o disi, amb'aquò agrada pas a tot lo mond e m'en foti bravament ! e a un punt que podetz pas imaginar !

  • 2
  • 2
Guilhem Pujol Seta
8.

#7 E vos sètz pas encara trachat que raport a l'occitan i-a pas mai de drècha que d'esquèrra ? Que son totis de jacobins nacional-parisianistas acarnassits ? Levat quand son dins l'opausicion e que promètan tot e son contrari per ésser elegits ? Fagatz-nos pas creire que l'aparament de l'occitan seria sonque una question de "gôch" o de drôat" ! Aquel Wauquiez messorga tan coma los autres politicians franceses, prigondament infèudats al sistètma ideologic jacobin.

  • 8
  • 0

Escriu un comentari sus aqueste article