Bandièra01 1180x150: Comuna de Tolosa

Actualitats

Crida per que l’occitanisme siá present a las eleccions municipalas francesas de 2020

Dissabte que ven se reüniràn a Tolosa per analisar l’experiéncia de Bastir 2014 e “crear una coordenacion que permeta una preséncia visibla e eficaça de l’occitanisme a aquelas eleccions”

| https://commons.wikimedia.org/wiki/User:Unuaiga
Ven de se lançar una crida per que l’occitanisme siá present a las eleccions municipalas de 2020 dins l’estat francés. D'efièch, apèlan a un rescontre a Tolosa dissabte venent, 10 de novembre, per analisar l’experiéncia de 2014 amb Bastir e per “crear una coordenacion que permeta una preséncia visibla e eficaça de l’occitanisme a aquelas eleccions”.
 
L’idèa es sortida de las reflexions fachas a l'ocasion de la Dintrada, lo 22 de setembre passat a Tolosa, ont una trentena de personas discutiguèron de l’interès que i auriá a tornar lançar una crida similara a Bastir per las municipalas que venon.
 
Aqueste còp, o vòlon far en prenent un pauc mai de temps que çò que se faguèt en 2014 e en aprofechar l’experiéncia passada.
 
Se tracta pas de crear un partit politic. S’agís simplament, de faiçon pragmatica, de far que de personas convencudas que l’occitanisme es portaire d’un messatge que fa mestièr a nòstres territòris sián presentas sus de listas divèrsas, puèi que sián elegidas dins de conselhs municipals per metre en plaça de projèctes concrets.
 
 
Rendètz-vos
 
L’acamp es convocat lo 10 de novembre que ven a 10h, dins la sala Nelli de l’Ostal d’Occitània. Se tròba al numèro 11 de la Carrièra Malcosinat a Tolosa, près de l’estacion de mètro Esquiròl.
 
L’òrdre del jorn prevei de far un bilanç de l’experiéncia de Bastir 2014, d'analisar lo manifèst occitanista, de lo metre a jorn se cal e de crear l’organizacion per 2020.
 
 
L’experiéncia de Bastir
 
Bastir foguèt lançat en 2014 coma un recampament a l’entorn d’idèas e de proposicions concretas per intrar dins de conselhs municipals. De tèxtes serviguèron de basa: un tèxt sonat “Manifèst occitanista” e un autre  que fasiá de proposicions programaticas. Una organizacion leugièra se metèt en plaça e i aguèt mai d’un centenat de candidats labelizats Bastir, sus de listas divèrsas. I aguèt d’elegits, e cal dire qu’an fach un trabalh qu’es pas de negligir.




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" igualada (PP.CC.)
7.

Hi tant que hi han d'ésser, i a tots els municipis! Només faltaria que a Occitània no manessin els Occitans.
Hi han d'ésser hi i seran, i amb pas ferm, tal com ha d'ésser.
Visca la Terra...Lliure!
L'Ernest, "El Tàrrega".

  • 0
  • 0
Occitanista bearn
6.

#3 qu'ei un jornau occitanista aciu. Mercés de non pas poluar lo noste espaci dab la vosta pròsa. Sustot que n'ei pas la medisha lenga, non?

  • 1
  • 1
Abram Auvèrnhe
5.

D'en promèir seriá l'ocasion per los ciutadans francés e occitans de descubrir en massa la mapa d'Occitània granda, la veritadèira e non pas aquela sembla region tecnocratica que ne'n raubèt lo nom fai quasi tres ans... Una avançada d'aquelas mai bèlas desempuei pro temps !

  • 3
  • 1
Mèfi! 31
4.

Occitanisme
Le(s) movement(s) occitanista(s) a(n) pas le monopòli de l'occitanisme, qu'es un interès e una estima de tot çò que representa Occitània.
Le principi de transversalitat politic es eminentament estrategic; mais rèsta de prèndre en còmpte toutes aspèctes de l'occitanisme.

  • 3
  • 0
JUIG
3.

#2 Malurosament, bilanç concrets, autocritica e remesa en question ne son pas de mòda dens l'occitanisme. Que comptan lo nombre de Calandreta e qu'ei tot...

  • 13
  • 12

Escriu un comentari sus aqueste article