Actualitats
Tolosa: an creat “Bolegadís - Think tank d’Occitània”
Sa tòca es d’elaborar d’idèas e d’estrategias per crear de riquesas, d'emplecs e d'activitats en s’apiejant sus la difusion de la cultura d’òc
Se creèt lo 7 de decembre passat a Tolosa un grop de reflexion qu’amassa d’actors economics, de personalitats politicas e de responsables associatius. L’estructura se nomena “Bolegadís - Think tank d’Occitània” e sa tòca es d’elaborar d’idèas e d’estrategias per crear de riquesas, d'emplecs e d'activiats dins la region qu’a pres lo nom d’Occitània, en s’apiejant sus la difusion de la lenga e la cultura occitanas.
Installat a l’Ostal d’Occitània de la Ciutat Mondina, lo think tank es fondat per Joan-Francés Laffont, president de Convergéncia Occitana; Dominique Drouet, cap de zòna del grop Lafarge-Holcim; Gilles Bourguignon, president-director general de Fournil de Gilles; Jean-Louis Pech, president-director general del grop Actia -Toulouse; Jean-Michel Lattes, adjonch al cònsol de Tolosa; Joan-Pèire Laval, president de País Nòstre; Frantz Venes, del castèl Massamier La Mignarde; Jacky Grau, president de Convergéncia Narbonesa; Jean-Luc Davezac, de Bastir Occitània, e Maxime Maury, director de Banque de France- Occitanie.
Lo mot think tank (depaus d’idèas) proven de l’anglés, a causa de l’abondància d’aquel tipe d’estructuras que i a als Estats Units. Son d’organizacions que prepausan de conselhs e d’idèas sus d'afars de politica, de comèrci e d’autres interèsses. Sovent son restacats als laboratòris militars, a las entrepresas privadas o a las institucions universitàrias. Elabòran d’analisis o de recomandacions politicas.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
mèrci d'ave'm esfaçat !
Aquò me fa pena e me fa soscaire. Òc, "soscar" per "pensar" (coma "discutida" per "discussion"/"discuta") es un barbarisme modèrne de la traca de las panoccitasenadas.
Pel think tank, vos remandi a la Oisquipèdia.
http://oisquipedia.wikia.com/wiki/Think_tank
Que cal ben rire un pauc.
#12 S'agis pas d'una iniciativa sus Occitània tota. Qu'es nonmas sus la Region Occitanie. Adonc, qu'es una iniciativa d'entreprenaires locaus, dins una region d'Occitània, per quela region unicament. Coma si quauques occitanistas entreprenaires en Lemosin fasian un grop de reflexion. E mai, qu'es un grop mai que mai tolosenc. Pense que son accion serà limitada au bacin economic de Tolosa. Un nom coma "Cambra economica occitana de Tolosa" auria èsser un nom mai appropriat, mai representatiu de çò qu'es, mai oneste. Podem dire qu'es "occitan" perque sembla que vòlen s'apiejar sus la lenga occitana. Podem pas dire qu'es d'occitanisme, perque n'i a pas dau tot de perspectiva transoccitana dins lo projecte.
Es una bona causa, aplegar a personas que saben, per poder ajudar a nostra estimada Occitània que demora captiva en mans dels chovinistes mai curts que fats per encàrrec. Acò es lo primier, far comprene que las libertats que hauria d'haver Occitània ajuda a progressar lo sector econòmic e los altres sectors, cultural, turístic, audiovisual,cientific,matemàtic,....
Totas aquelas associacions occitanas que gaireben cada matin una novèla nais, me sembla mai un signe de "deadlock" que d'activitat !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari