Bandièra01 1180x150: Comuna de Tolosa

Actualitats

Un pòble isolat d’una illa de l'ocean Indian a tuat un jove estatsunidenc que los voliá evangelizar

John Allen Chau de 26 ans voliá “establir lo reialme de Jèsus” dins l’illa de Sentinèla del Nòrd, ont los abitants an pas jamai volgut aver de contacte amb l’exterior

John Allen Chau segon un imatge qu'el publiquèt sus Instagram
John Allen Chau segon un imatge qu'el publiquèt sus Instagram
Un jove ciutadan estatsunidenc, John Allen Chau de 26 ans, seriá estat tuat pels abitants de l’illa de Sentinèla del Nòrd, un pòble isolat qu’a pas jamai volgut aver de contacte amb la rèsta del Mond. Los pescadors que lo menèron fins a l’illa aurián vist de luènh, lo 16 de novembre passat, cossí l’avián abatut amb de sagetas e rebalavan son còrs sul sable. Ara las autoritats d’Índia son a ensajar de localizar lo còrs.
 
La quita victima, qu’aviá ja fach qualques ensages per contactar aquelas gents, aviá declarat abans de partir pel darrièr còp que i anava per temptar d’evangelizar la populacion de Sentinèla del Nòrd, una illa de l’archipèla de las illas Andaman e Nicobar, dins l’ocean Indian. L’archipèla es relativament pròche de Tailàndia e Birmania, mas es administrat per Índia.
 
John Allen Chau aviá vesitat l’archipèla en 2015 e 2016. En octòbre passat, i tornèt amb l’intencion d’establir un contacte amb los abitants de Sentinèla del Nòrd, amb lo plan d’i “establir lo reialme de Jèsus”, segon çò qu’el meteis aviá dich suls rets socials.
 
Lo 15 de novembre passat, Chau paguèt 325 dolars a sèt pescadors per que lo sarrèsson illegalament de l’illa que se tròba a una cinquantena de quilomètres de Port Blair, la capitala de l’archipèla.
 
Quand foguèt a proximitat, arribèt amb un caiac sus la plaja e interagiguèt amb los abitants en lor donant coma present un balon de fotbòl e un peis. Sembla qu’aquò agradèt pas als abitants, que li lancèron una sageta que toquèt un dels libres que Chau portava. El partiguèt còp sec fins a la barca dels pescadors que l’esperavan a qualques mètres dins la mar. L’endeman, i tornèt, e tanlèu qu’aguèt chaupit la plaja, los abitants li tirèron de sagetas. Segon los pescadors qu’èran en mar, un còp mòrt l’aurián rebalat sul sable abans de l’enterrar.
 
 
Un pòble isolat e protegit per las leis d’Índia
 
Sentinèla del Nòrd es una illa d’aperaquí 70 km2. Sos abitants son coneguts dempuèi qualques sègles coma un pòble agressiu envèrs los estrangièrs. Mas se’n sap pas grand causa. Se crei que son qualques centenats d’abitants que vivon en fasent los caçaires-culheires. Los pauques imatges que n’avèm mòstran lor abiletat amb los arcs e las sagetas, e lor agressivitat envèrs los estrangièrs.
 
Es un pòble protegit per las leis d’Índia, qu’an interdich de vesitar l’illa per evitar que s’i pòrte de malautiás inconegudas del sistèma immunitari dels abitants, isolats dempuèi la nuèch dels tempses.
 
Pasmens, l’archipèla de las Andaman foguèt un dels luòcs ont los primièrs antropològs professionals faguèron lors recèrcas e collectatges. Lo libre The Andaman islanders , una etnografia sus l’archipèla que la publiquèt en 1922 Alfred Reginald Radcliffe-Brown, es una òbra màger de la literatura antropologica.
 
 
Caldrà de temps per recuperar lo còrs
 
Segon lo cap de la polícia de l’archipèla a dich que serà complicat de resòlver l’afar. “Avèm mantengut una distància amb l’illa, e i sèm pas encara arribats per recuperar lo còrs. Aquò pot durar encara qualques jorns e qualques expedicions de reconeissença”, çò diguèt als mèdias. “Nos cal velhar de perturbar pas los abitants de l’illa. Es un luòc extrèmament sensible, e per tant caldrà de temps.”
 
Los sèt pescadors que menèron John Allen Chau son estats detenguts.
 
 
“Establir lo reialme de Jèsus”
 
Chau auriá fach qualques viatges en caiac de la nau dels pescadors fins a l’illa. Lo darrièr còp, lor daissèt un messatge escrich, en cas que tornèsse pas, ont assegurava son intencion de cristianizar aquel pòble: “Fau aquò per establir lo reialme de Jèsus dins l’illa. Acusetz pas pas los natius se me tuan”.
 
En mai d’aquò, daissèt d’autres messatges ont assegurava qu’aviá establit de bonas relacions amb qualques abitants de l’illa, mentre que d’autres s’èran mostrats fòrça agressius amb el.
 
Dins los perfils que Chau aviá suls rets socials, se mostrava coma un aventurièr qu’aviá ja vesitat mai d’una vegada las illas Andaman.
 
 
La familha perdona als murtrièrs
 
La familha de John Allen Chau a publicat sul compte d’Instagram de la victima un messatge ont demanda que se perseguisca pas cap persona de l’illa en question e que se libère los pescadors que l’acompanhèron.
 
 
 
 
 
 
 
 
 
 
 
 
 
 
 

John Allen Chau

A post shared by John Chau (@johnachau) on


 
 

 
 

 
 




abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jig
18.

Madhusree Mukerjee, un autor deu Scientific American, que i descriu las òrras exaccions infligidas aus andamanés au temps de l’Empèri britanic, e las adaptacions culturaus e se pòt biologicas a lor enviroament qui’us avèn permetut de s’esvitar despuish arribar d’Africa 60.000 ans enrèr.
De léger ací en anglés: https://blogs.scientificamerican.com/observations/the-american-killed-by-asian-islanders-hoped-to-save-their-souls/

Que’vs dau lo son darrèr paragraf:

«Jo tanben qu’aproshèi l’isla en batèu en 1998. A distància que vedoi un canoa dab dus òmis de pès, a pescar. D’autes sus la plaja observèvan l’encontre. En nos véder los pescadors que tornèn tà l’estran, e nosauts que partim. Que’m sabi mau d’aquesta vesita. Quan ne serà pas que per quauques minutas, qu’estó ua invasion de lor tranquillitat. Au mensh n’aví pas en l’idea, com John Chau, de’us anar ensenhar nada saviessa. Çò qui poirí jo, membre d’ua civilizacion qui en quauques sègles a partvirat la biosfèra de tot un planeta, auherir a monde qui se las an viradas despuish l’aube de l’umanitat ençà sus aqueths cagalhs d’islas? Ne serén pas meilèu las sentinèlas qui ns’agin quauquarren a ensenhar?»

  • 15
  • 0
La caméra explore le temps
17.

Coma que, i a pas solament que los fanatics de DAECH prèstes a morir per propagar las ideias delirantas de lor secta edat-mejanenca.

  • 15
  • 1
Victor Jara Santiago de Chile, 11 sept 1973.
16.

Envahisseurs et grenouilles de bénitier ! Et laisser les gens tranquilles chez eux, ils savent faire ces abrutis d'américains ?

  • 14
  • 0
Atahualpa
15.

Aquel tipe portava lo vèrme dins lo fruch. Urosament qu'an pogut l'arrestar a temps.

  • 17
  • 1
Ni Diu Ni Mèstre
14.

"Instaurar lo reiaume de Jesus ". Tsss....Cal vertadièrament ésser un american destimborlat per creire encara a n aquelas fadurlas. De l'Inquisicion a l'Opus Dei, de Montsegur a Guernikà, quantes millions de personas torturadas e tuadas, quantas civilizacions sagatadas e mastrassadas al nom d'aquesta sècta sado-masochista d'enjuponats pedofils ?

  • 20
  • 2

Escriu un comentari sus aqueste article