Bandièra01 1180x150: Comuna de Tolosa

Actualitats

Vòlon suprimir l’occitan de l’educacion publica

Lo Ministèri de l’Educacion suprimís lo finançament de la lenga d’òc en collègi e licèu dins l’acadèmia de Tolosa

| FÈLCO-CREO
L’ora es gravissima. Pels provisors de licèu e principals dels collègis nos arriban los messatges del rectorat e del ministèri. Son clars: vòlon chaplar l’occitan en licèu e collègi dins los uèit departaments de l’acadèmia de Tolosa, una de las onze subdivisions escolaras que tòcan Occitània dins l’estat francés.
 
Ça que la, a un rescontre del Centre Regional dels Ensenhaires d’Occitan de Tolosa (CRÈO Tolosa) e de la rectritz Anne Bisagni-Faure, lo 21 de decembre de 2018, foguèt dit l’exacte contrari. Mas ara, de tota aquela charradissa messorguièra, ne demòra pas res. Pas cap d’ora d’occitan serà finançada e de desenats de professors seràn privats de faire lor mestièr.
 
Es pas que dins l’acadèmia de Tolosa, mas pertot en Occitània que l’occitan dins los segondari es liquidat. D’anóncias de barraduras foguèron faitas en Provença ont lo rector se trufa “d’una lenga que se parla pas”. L’explicacion de la fin de l’occitan es lo pretèxte de la reforma Blanquer dels licèus. La vertat es que i a una volontat evidenta de n’acabar amb l’occitan al ministèri de l’educacion de París.
 
Dins los licèus de l’acadèmia de Tolosa, foncionam gaireben pertot amb de dotacions especificas que nos venon del rectorat. En 2019, aquestes mejans nos son retirats. Pas cap d’ora d’occitan serà finançada e de desenats de professors seràn privats de faire lor mestièr. Aquò significa la mòrt de l’occitan en licèu e en collègi en setembre de 2019.
 
Ara, es la mobilizacion generala: elegits, parents d’escolans, associacions occitanas, professors, regents, escolans, mèdias, totes son d’avertir, tots an de se manifestar tanben.  Avèm pas la causida: es la guèrra!
 
Totes los professors d’occitan son convidats a venir a l’Assemblada Generala de la FÈLCO, lo 2 de febrièr a Montpelhièr, per pensar a d’autras accions.
 
Per los del CRÈO Tolosa, l’occitan es mai qu’un mestièr, es una passion, es nòstra vida de cada jorn. Alara, nos daissarem pas tòrcer!
 
 
 
 
Nicolau Rei-Bèthvéder


 
 
 
fffff fffff
 Fa dos ans, lo ministèri e l'ÒPLO asseguravan l'educacion publica de l'occitan
 
Ara fa justament dos ans, la ministra francesa de l'educacion signava a Tolosa una convencion quadre per l’ensenhament de l’occitan. Lo Ministèri de l’Educacion francés, cinc acadèmias e l’Ofici Public de la Lenga Occitana (ÒPLO) signavan un acòrdi per assegurar l’educacion publica de l’occitan a la mitat occidentala del país.
 
La convencion, escricha per ÒPLO, se presentèt a la ministra e a las cinc circonscripcions educativas, apeladas acadèmias. Lo tèxt assegurava d’oraris normals a l’ensenhament de l’occitan, planificava una produccion e la distribucion de material pedagogic en lenga nòstra, portava de melhoraments als pòstes dels ensenhaires occitanofòns e a lors cerfificacions, e prevesiá la difusion dels ensenhaments de l’occitan o en occitan dins las escòlas publicas.
 
Aquò, que semblava una primièra e sens cap de dobte una reüssida de las bèlas per l’ÒPLO, s’es pas gaire materializat. Ara sembla que tot serà suprimit.
 
 
 
 
La redaccion
 
   





abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

elkartasuna Toulouse
24.

"L’année 2018 aura été marquée par un combat sans relâche pour Seaska. Une lutte qui a porté ses fruits puisque le 19 décembre dernier, tous les partenaires concernés, y compris l’Etat, ont adopté un budget qui permet à l’Office public de la langue basque de financer les postes qui faisaient défaut."
mediabask.eus - 29/12/2018
Soit, Seaska est sous statut privé, mais il en va de même avec Ikas-bi (public) : il s'agit d'un rapport de force que vous devez imposer (sans vouloir être moralisateur) partout, tout le temps (jusque dans leur "débat").
Elkartasuna signifie solidarité.

  • 8
  • 0
Hilh
23.

Ua causa b'ei donc segura, tant per tant augi bèth endom, l'ensenhament qu'ei la darrèra via de transmission de l'occitan e qu'am a batalhar endà deféne'u.

Pr'aquò que rèsta ua question qui chepica: la volentat d'estauviar per part de l'Estat b'ei grana e ne s'arrevirarà pas doman. L'occitanisme que n'ei pas qu'un petiton sector pertocat enter mile autes pr'aquò eth qu'ei largament avitat peu finançament public.

En aquera situacion que cau saber que viveràm bahida aqueths miscaps de hiu las annadas qui vienen. Esperar créisher qu'ei, a fortiori, un saunèi, totun Diu sap se'ns hè besonh.

Quin adaptà's a tot aquò? S'ac podem? N'ac sèi pas, mes que j'a de que dà's un beròi copa-cap.

  • 4
  • 0
ltrobat
22.

#13
:-)

Per çò qui ei deu men " pseudò ", qu'assumi aquesta forma d'anonimat despuish lo dia quan me soi apercebut qu'au contre deus autes medias on avói lo parat de m'exprimir, n'i a pas vertadièrament nat desbromb sus internet. Çò qu'escrivetz qu'ei estacat au vòste nom per annadas.
De mei, ne'm serveishi pas de l'anonimat entà insultar monde. E tau monde qui'm coneish, lo men chafre qu'ei pro transparent.
Enfin, avossi causit un nom completament fictici com, per exemple Jean-Robert Bordenave, arrés ne m'at averé arcastat...

Ne demandi pas a degun de'm fretar las cauçaduras. Com at disè lo Nietzsche "Que'm hè hasti de seguir atau com de guidar”. Mes, totun, ne sabèvi pas que calèva postar lo son CV d'occitanista abans d'exprimir ua opinion un drin critica sus l'anar de l'occitanisme.
Donc que precisi, entà clarificar las causas, qu'ei ensenhat l'occitan pendent 5 ans, qu'èi transmetut la lenga aus mens mainats, que hasói partida (a un moment dat) deu burèu d'ua escòla Calandreta e que sostieni dab sòus mens, cada còp qu'ei possible, manifestacions culturaus occitanas.
N'ei pas tot a fèit lo perhiu d'un IBGista, mes qu'èi la feblessa de pensar que tot n'ei pas perfèit en çò deu noste petit monde occitanista (quitament se los defauts que i puntegi e son plan mensh redibitòris que los deus biarnistas d'en fàcia).

Quiò, que repotegui contra aquesta istòria de nom de region. Dilhèu qu'avetz l'escadença de demorar deu bon costat de la termièra administrativa. Nosautes en Biarn qu'avom de har rampèu fàcia a la propaganda de l'IBG e har lo noste tribalh tà convéncer lo monde que lo noste parçan èra tanben ua part d'Occitania. La decision de mantuns occitanistas de MPLR de sostiéner lo nom d'"Occitanie" qu'estó viscuda a noste com ua traïson. Qu'èm quauques uns a aver lo sentiment d'estar estats lo cocuts de l'ahar, daubuns que parlan quitament de còp de cotèth dens l'arrea...
A l'epòca que m'estó dit qu'aquesta causida de nom de region qu'estora ua ocasion istorica. Dus ans après que hèi lo bilanç: n'i a pas vertadièrament de que regaudí's. Après d'aver privatizat lo concèpte d'Occitania tà un parçan que n'ei pas sonque lo terç, ne vedi pas çò qu'aquò a portat a la lenga, a la soa socializacion, a l'ensenhament... La victòria maja de l'occitanisme anonciada a l'epòca ne'n vedi pas nat traç.
Mes bon, aparentament n'at cau pas díser. Serrez les rangs! Je ne veux voir qu'une tête!

  • 9
  • 7
Mèfi! 31
21.

Es un tèst de resistència del regime macronista; tot depend de la protèsta que vendrà e s'apondrà als movements actuals.


  • 8
  • 0
GJ 31 san giron
20.

Alea jacta est!

L'istòria ne hara pas de present a los que son eternaus victimas e qu'an arrestat de lutar.
Que hé ua pausa que la guèrra ei declarada.
Ua pausa que l'etnocidi contra la nosta nacion qu'ei apitat per la republica.
Adara qu'èm a las crotzadas deus camins.
Que devem transformar aquesta ataca istòrica en ua navèra etapa de la luta nosta.
Tots-totas amassas!

  • 8
  • 0

Escriu un comentari sus aqueste article