Bandièra01 1180x150: Comuna de Tolosa

Actualitats

Espanha: demission de la directritz generala del trabalh per aver autorizat un sindicat de la prostitucion

Aquel sindicat revendica sa legalitat e recòrda que vòl existir per que los trabalhadors sexuals ajan de dreches del trabalh dignes

| Sindicat OTRAS
Dimars passat, demissionèt la directritz generala del trabalh del govèrn espanhòl, Concepción Pascual, après que la ministra del Trabalh espanhòla, Magdalena Valerio, li aguèt demandat compte per aver enregistrat un sindicat de trabalhadoiras sexualas.
 
Aquel sindicat, que son sèti es a Barcelona, revendica sa legalitat e ramenta que cèrca d’existir per que los òmes e las femnas que trabalhan dins lo domeni de la prostitucion benefícien de comjats de maternitat o de malautiá, d’un salari digne, d’un mes de vacanças e d’una retirada digna.
 
La legalizacion del sindicat provoquèt una fòrta polemica. Lo quite sindicat assegura que la polemica s’explica per la “falsa moralitat e l’òdi visceral que l’amaga lo feminisme borgés”.
 
La ministra assegurèt qu’aviá pas cap de coneissença de l’acòrdi del ministèri amb lo sindicat e insistiguèt per dire que la prostitucion es illegala dins l’estat espanhòl e que, per tant, son govèrn pòt pas sosténer una activitat que “contraven als dreches fondamentals dels òmes e de las femnas que per necessitat o per de situacions divèrsas devon cedir lors còrses per qu’un tèrç n’abuse”.
 
 

 
 
 


abonar los amics de Jornalet
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Se tracha pas de prene la defensa de la prostitucion, mas los que la vòlon enebir vivon fòra de la realitat. Es la nòva tissa de mantun partit socialista en Euròpa*. Es pas la lei que la farà desaparéisser. Faràn pas que la butar dins mai de clandestinitat es a dire mai de banditisme e de criminalitat. La quita Marthe Richard se mainèt que s'èra enganada. En mai d'aquò, los que fan las leis, i a pro d'ipocritas demest eles que mai d'un es client de la Madama Claude del Païs. Alara que fagan los refastinhoses davant la creacion d'un sindicat de trabalhadoiras sexualas, es se trufar del mond.

*Coma son incapables de cambiar l'anar del mond cap a l'espleitacion cada còp mai dura de "los d'enbàs" (Uber, Amazon, caumatge, eca) e la catastròfa ecologica que i anam coma l'ase quand tròta, s'ocupan pas pus que de voler regir las mors.

  • 2
  • 0

Escriu un comentari sus aqueste article