Bandièra01 1180x150: Comuna de Tolosa

Actualitats

Massissa manifestacion independentista a Madrid

La marcha seguissiá la crida d’una cinquantena d’associacions de tot l’estat espanhòl e se debanèt jos lo lèma “L’autodeterminacion es pas un delicte. Democracia es decidir”

| Assemblea Nacional Catalana
Madrid visquèt, dissabte passat, una insolita e enòrma manifestacion per l’autodeterminacion de Catalonha e contra lo procès dels presonièrs politics catalans. La marcha, que seguissiá la crida d’una cinquantena d’associacions de tot l’estat espanhòl, se debanèt jos lo lèma “L’autodeterminacion es pas un delicte. La democracia es decidir”. Lo crit mai ausit èra justament “No passaran” (Passaràn pas), en memòria del temps que catalans e madridencs luchavan ensems contra l’armada faissista del general Franco.
 
Èran 120 000 personas segon los organizaires, mas 18 000 segon las donadas del govèrn espanhòl. Una diferéncia chocanta, mai que mai se comptam que los manifestants arribèron a Madrid amb 520 autobuses e 15 TGV engatjats per l’organizacion. Los participants venián sustot dels Païses Catalans, de Castelha, d’Andalosia, del Bascoat, de Galícia e quitament de las illas Canàrias. I aviá tanplan fòrça collectius madridencs.
 
De representants de Taula per Aran i brandiguèron lo drapèl occitan.
 
Demest los manifestants se trobavan lo president de la Generalitat en foncions, Quim Torra, e lo del Parlament catalan, Roger Torrent, e 150 cònsols màgers catalans e fòrça ministres del govèrn de la Generalitat. Èran acompanhats per de representants dels principals sindicats catalans, pel Sindicat Andalós dels Trabalhadors (SAT), per la plataforma independentista del Bascoat Gure Esku Dago, pel collectiu de Madridencs pel Drech de Decidir, pels movements republicans de las universitats madridencas, per l’associacion de las Maires contra la Repression e per divèrses partits politcs coma EH-Bildu, lo Blòc Nacionalista Galèc (BNG), lo Partit Comunista d’Espanha, Esquèrra Unida e Esquèrra Castelhana, e plan d’autres.
 
L’eveniment s’acabèt amb los parladisses dels representants de l’Assemblada Nacionala Catalana, d’Òmnium Cultural que defendèron l’innocéncia dels presonièrs politics jutjats e projectèron un vidèo del jutjament. Puèi tanben s’exprimiguèron un dels parents dels joves d’Altsasu, lo secretari general del SAT, Óscar Reina, l’activista Elena Martínez de la Coordinacion 25S, e lo politilòg madridenc Jaime Pastor. Enfin, la cantadoira canària Alicia Ramons, activista del movement LGTBIQ, saludèt en amazigh los independentistas canaris presents a la manifestacion e interpretèt la cançon Canto a la Libertad (Cant a la Libertat). L’eveniment lo clavèt una cantada comuna de L’estaca que produguèt un imatge insolit e esmovent del còr de Madrid.
 
Demest totas las bandeiròlas que se mostrèron a la manifestacion, ne volèm soslinhar una que resumissiá lo sentiment general dels manifestants, catalans e non catalans:
 
“Libertat, presonièrs politics catalans!
Agachi endavant
e es pas brica clar ont anam,
alavetz agachi endarrièr
e vesi tot clar qu’es çò que fugissèm”.
  
 
Vejatz en seguida lo vidèo de tota manifestacion:
 

 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Una prova de força la de portar 50 000 personas a manifestar per la libertat dels presos politics, per la Castellana i Cibeles. Banderas Republicanas, d' Izquierda Castellana, de sindicats d'Andalucia, de Mallorca, Galicia, d'Euscadi. Una cosa mai vista,que la censura de las televisions de Madrid silenciaren coma se haguessen vist la caiguda de l'imperi franquista.

  • 4
  • 0
Enric Mala Tèsta
4.

#1 Occitània Today, adiu ! Se per cas o aviás pas encara comprés, Lo Jornalet es un diairi collaboratiu, alestit per sos lectors. As de novèlas de París que nos concernisson ? Fai-ne un article ! As una opinion Black Blòc de nos far valer : fai-ne una pagina d'opinion, e te legirai amb atencion.

Mas en 1936, a Barcelona, lo pòble aviá comprés qu'una autentica Republica se bastís amb las mans de totes e cadun. Alavètz, pòrta ta pèira, tu-meteis, o cala-te ! La cultura occitana es pas consumerista, mas activista… o mòrta.

  • 9
  • 0
Occitània Uei Marselha
3.

#1 Òu, companh, as dormit o qué?

La revendicacion catalana es tanben una revendicacion aranesa, donc es una revendicacion occitana, es nos pertòca a totei leis occitans. Aquela convergéncia dei democratas a Madrid pòu implicar de resultats concrets per lei drechs deis occitans en Aran, e aquò m'interèssa fòrça a ieu, que siáu un occitan de Marselha.

Lei trebolums dei corsets jaunes a París son una nòva importanta tanben, mai pertòca fòrça mens directament la revendicacion occitana.

Desaliena-te e pensa segon teis interès d'occitan, collèga!

  • 20
  • 14
Felip Martèl Montpelhier
2.

#1 Aquò dich, coma per l'essenciau la premsa francesa parla pas de la manif de Madrid, e plora suu Fouquet's, digam qu'amb lo papier de Jornalet aquò fai una meana…
Cò important, es que la manif de Madrid, segond la Vanguardia a rechampat au mens aitant de monde (45-50 000) que la de la drecha ispanista contra los catalans quauques semanas en reire, maugrat lo renfòrt de Valls. Chau sotalinhar lo fach de portar au cuer d'Espanha la revendicacion catalana, e, mai important encara, amb lo sosten de la gaucha espanhòla, contra totes los observators que peròran suu costat "barrat" de la revendicacion catalana.

  • 24
  • 12
Occitània Today
1.

Aquel dissabte l'auto-proclamada avenguda mai bèla del mond ven d'esser saquejada a Paris. An cremat la cantina de Sarkozy e tanben un molon de botègas de lussi qu'apartènan a de milionaris totis colègas del President Dels Rics. La revolta anti-macroniana n'es a son quatren mes e Jornalet nos parla de...Madrid ! Ont s'extasia d'aver reperat un drapel occitan al dintre de la manif catalana. Compliments !

  • 31
  • 25

Escriu un comentari sus aqueste article