L’avocat Gianmarco Negri es lo primièr cònsol màger transgenre d’Itàlia après sa victòria a las eleccions localas de Trümé (oficialament Tromello) en Lombardia, un endrech que tradicionalament vòta per la Liga Nòrd de Matteo Salvini.

Negri èra en cap d’una lista esquerrista e a atench lo 37,5% dels vòtes, e lo Ministèri de l’Interior italian n’a confirmat la victòria. Per contra, lo candidat de la Liga n’a obtengut sonque lo 25,8%, e mai lo partit d’extrèma drecha aja atench, dins aquel meteis vilatge, lo 53% dels vòtes a las eleccions al Parlament Europèu.

Nascut Maria, Gianmarco aguèt una vida aisida fins que diguèsse “pro”, çò explica lo cònsol màger aIl Corriere della Sera. “Una psicoterapeuta de Vigevano m’ajudèt a prene la decision de venir Gianmarco”, çò ditz en tot precisar que s’es “totjorn sentit òme” e qu’après divèrsas operacions s’es pogut retrobar a el meteis.