Bandièra01 1180x150: Comuna de Tolosa

Actualitats

Puigdemont al Parlament Europèu: “Esperam una decision abans lo 2 de julhet”

L’estat espanhòl empedís la nominacion de Carles Puigdemont, Oriol Junqueras e Toni Comín coma eurodeputats amb 2,5 milions de vòtes

Lo president de la Generalitat de Catalonha en exili, Carles Puigdemont, ara elegit eurodeputat, faguèt ièr una conferéncia de premsa al Parlament Europèu un jorn après que lo Conselh Electoral espanhòl l'aguèt empachat d’èsser nomenat. Puigdemont diguèt qu’el esperava que lo Tribunal de Luxemborg, ont de pausaràn un recors, resolveriá l’afar abans l 2 de julhet, jorn de la constitucion de l’eurocambra.
 
Ongan, l’estat espanhòl a exigit dels eurodeputats elegits qu’anen a Madrid per jurar la Constitucion espanhòla per tal de confirmar lor nominacion. Carles Puigdemont e Toni Comín, totes dos en exili en Belgica, i mandèron lor avocat Gonzalo Boye, amb de procuracions que l'autorizavan, mas lo Conselh Electoral espanhòl o refusèt. Tanben Oriol Junqueras, en preson preventiva, demandèt d’anar a la ceremònia e far lo jurament mas lo jutge li o empediguèt.
 
“Sèm a patir un tèst d'estransi per la democracia europèa que pertòca totes los ciutadans de l’UE”, çò diguèt Puigdemont en tot remembrar que segon lo Tractat de Lisbona los tres elegits perseguits per la justícia espanhòla representan “los ciutadans de l’UE”. En mai d’aquò, recordèt que lo Parlament Europèu aviá dich net e clar qu’èra “inacceptable d’enebir que lo mond qu’an recebut mai d’un milion de vòtes accediguèsson al Parlament”.
 
Puigdemont a tanben confirmat que quand el e Comín serián confirmats eurodeputats, integrarián lo grop dels Verds.
 
 
Manifestacion a Estrasborg lo 2 de julhet
 
Lo 2 de julhet, durant la sesilha de constitucion del Parlament Europèu, lo Conselh per la Republica a cridat a una manifestacion a Estrasborg per exigir que Puigdemont, Comín e Junqueras pòscan èsser eurodeputats. La tòca es que siá una protèsta massissa per la libertat dels presonièrs politics e per que l’eurocambra tenga en compte los 2,3 milions d'electors que votèron per aqueles representants elegits democraticament.
 
Serà la tresena manifestacion que los independentistas catalans organizan a l’exterior. Las precedentas son estadas plan reüssidas: lo 7 de decembre de 2017 manifestèron a Brussèlas 45 000 personas e en març passat mai de 120 000 personas manifestavan a Madrid.

 
 
 

 

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Silvabarba
3.

#2 Pels biologistas qu'estúdian l'ecologia (scientificament) la nocion de "creissença verda" es tant bufèca coma la nocion de "aiga seca". La soleta causa que siá verda es la descreissença. Remplaçar de veituras a energia fossila per de veituras electricas per exemple es pura fotesa : l'electricitat es nucleària, es a dire iperdangierosa e iperpolluïssenta : la soleta solucion es de quitar d'aver besonh de las veituras, d'aver besonh de se desplaçar sempre e sempre per viure (o mailèu subreviure.

Disi pas qu'es illegitime de veire d'elegits ecologistas se i a d'electors ecologistas. Disi que son tant illegitimes los elegits ecologistas quand se dison ecologistas mentre que non combaton fòrt e mòrt lo deliri creissensista del capitalisme, coma son illegitimes los siá disent "socialistas" que non combaton fins a sa mòrt lo capitalisme.

Disi que lo capitalisme es l'enemic jurat de las classas espleitadas e de la Natura. Disi que lo al reglamentar e sometre als interèsses de la Natura e de l'Umanitat, e que se non lo volèm atal somètre sèm pas ni ecologistas ni esquerristas. E o manteni…

  • 1
  • 0
Pitaluga
2.

Respondrai pas a las asenadas suls ecologistas. Sembla que i a de mond qu'an pas pres la mesura del desastre que sèm a viure e que s'imaginan encara que los partits tradicionals an encara de solucions. Amb totes los defèctes, los Verds son los sols que fan una analisa seriosa de la situacion.

Mas mon comentari es sus una comparason (justament, per azard) amb los verds: los votants dels deputats sobeiranistas catalans (2 5000 000) son gaireben tan nombroses coma los de la lista Verda francesa (3 000 000). Qual pòt encara dire que son pas legitims?

  • 1
  • 1
Silvabarba Fangòrn - Tèrra del Mièg
1.

« Puigdemont a tanben confirmat que quand el e Comín serián confirmats eurodeputats, integrarián lo grop dels Verds. » Aquò me fa soscar al cap de tièra ecologista francés, Y. Jandot, quand a declarat, recentament : « Non soi ni d'esquèrra ni de dreita ».

Los Verds se pretendon ecologistas. L'ecologia es una sciéncia rigorosa. Prengam un exemple concret, l'usatge dels pesticidis coblat amb l'usatge de las plantas de cultura OGM. Scientificament, la nocivitat de l'ingestions de plantas geneticament modificada es encara en discussion. Per contra, scientificament, lo desastre ecologic que constituís l'usatge dels pesticidis es mai qu'una evidéncia : es un preavís de mòrt anonciada. Partent d'un tal constat, los ecologistas (vertadièrs) s'opausan donc a l'usatge dels pesticidis. E plan logicament, los vòlon legalament enebir.

Enebir, mercés a una lei e de mejans per la far aplicar sense derogacion, una certana pratica industriala — per exemple la fabricacion e la distribucion dels pesticidis — reven, plan segur, a reglamentar l'industria e los afars.

Mas reglamentar los afars e l'industria (segon critèris autres qu'industrials e financièrs) aquò es exactament un projècte d'esquèrra, segon la definicion ela-meteissa de l'esquerrisme. O avètz probablament remarcat despuèi al mens Jospin (e mai abans), es exactament çò contrari que definís, per exemple, una refòrma dita "socialista actuala". Es precisament per aquesta rason que los electors potencialament esquerristas (es a dire, gents qu'exigisson unas reglamentacions e de limits clars als afars e a las finanças intra e internacionalas) non van pas mai votar.

Donc, me pausi tres questions :

1) Cossí un marriòl de politician se pòt encara pretendre "ni de dreita ni d'esquèrra" ? O reglamenta los afars subre critèris autres que financiaristas, e es d'esquèrra, o ben non los reglamenta pas e daissa donc los afars se reglar d'eles-meteisses, e alara es de dreita ! Un marriòl que vos ven contar que non es "ni de dreita ni d'esquèrra" se trufa donc obèrtament de vosautres…

2) Cossí un mariòl d'ecologista se pòt encara pretendre "ni de dreita ni d'esquèrra" ? O reglamenta los afars subre critèris ecologics, e es ecologista, o los reglamentas pas, e es de dreita, capitalista, e nos mena amb totes los autres marriòls del sieu clan a la catastròfa ecologica generala.Un marriòl pretendut ecologista que vos ven contar que non es "ni de dreita ni d'esquèrra" se trufa donc obèrtament de vosautres…

3) Es que Puigdemont, president independentista de la republica non encara reconeguda de Catalunya, de linha politica liberala, e donc dreitista, a causit la bona coalicion, lo bon grop parlamentari, per se far d'aligats ?

A la tresena question, vesi doas responsas possiblas :

a) O los Verds son ecologistas, e las amiras politicas (economicas) de Puigdemont lor semblaràn lèu incompatiblas amb lors amiras pròpias.
b) O los Verds son tant ecologistas coma los Socio-Democratas son d'esquèrra e Puigdemont se serà trobat una bona familha, al mièg d'una còla de marriòls que vos prenon per de pècs e se trufan de vosautres…

Los electors ecologistas — realament ecologistas — non s'i daissaràn pas longtemps colhonar e a las eleccions, coma los autres vertadièrs esquerristas, demoraràn a l'ostal mai que d'anar votar per de marriòls…

E los faiscistas continuaràn de dominar, coma actualament en França e en Espanha…

  • 3
  • 3

Escriu un comentari sus aqueste article