Bandièra01 1180x150: Comuna de Tolosa

Actualitats

A rescontrat l’òme que li ofriguèt una bicicleta fa 24 ans, quand èra refugiada

Gràcias a aquel present, la jove demandaira d’asil recobrèt la fisança en se après tant de temps de sofrenças e dificultats

Mevan Babakar viu a Londres e es una gojata de Curdistan de 29 ans que, gràcias a Twitter, ven de trobar l’òme que li crompèt una bicicleta quand ela era refugiada als Païses Basses dins los ans 1994 e 1995. “Adieu-siatz, Internet!”, çò escriguèt sus Twitter dins una tièra de fiuladas ont explicava son istòria e que voliá trobar aquel òme tan generós. “Vòli solament saber son nòm, m’ajudatz?”, çò demandava.
 
Los messatges de Babakar foguèron refiulats mai de 3000 còps e, fin finala, arribèron fins a Arjen van de Zee, un fotograf resident a Zwolle que reconeguèt lo benfactor: èra un de sos ancians collègas benevòls del camp de refugiats sonat Egbert que demorava en Alemanha dempuèi qualques annadas. Tanlèu localizat l’òme, Mevan Babakar es anada lo rescontrar per lo mercejar.
 
Bakabar e sa maire avián fugit lor país pendent la Primièra Guèrra del Golf, e traversèron Turquia, Azerbaitjan e Russia fins qu’arribèsson al camp de refugiats neerlandés de Zwolle. Aquí Babakar coneguèt Egbert, un benevòl que dirigissiá lo magazin ont los refugiats sollicitaires de l’asil cercavan de qué se fornir. Un jorn, Egbert vesitèt Babakar e sa maire dins lo camp de refugiats e lor ofriguèt coma present doas bicicletas, una per la maire e l’autre per la filha. Puèi, elas partiguèron devèrs lo Reialme Unit ont trobèron l’asil. Ara Babakar trabalha dins una organizacion caritativa.
 
Per ela, lo present “foguèt un gèst fòrça polit”. E mai precisava: “Quin enfant aimariá pas un present talament grand?”. Totun, çò mai important foguèt que gràcias a aquela dona, la filha recobrèt la fisança en se après tant de temps de patiments e dificultats.
 
 
 
 
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article