Bandièra01 1180x150: Comuna de Tolosa

Actualitats

Rugbi de XIII: los Gals e los Lops al paradís e, qui sap, dissabte, los Diables!

Jòia per la formacion canadiana de Toronto: l’an que ven, jogaràn en Superliga
Jòia per la formacion canadiana de Toronto: l’an que ven, jogaràn en Superliga | FFR XIII

Aquesta dimenjada nos a permés de conéisser lo campion NRL, la formacion que montarà del Championship en Superliga e l'aficha de dissabte que ven a Old Trafford per la finala justament d'aquesta Superliga.


NRL: los Polets demòran campions
 
Sens suspresa, aqueste dimenge, l'ANZ-Stadium afichava complet per la finala NRL entre los Gals (Sydney Roosters) e los Canberra Raiders. Lo primièr temps èra a l'avantatge dels Gals que marcavan un ensag transformat e una penalitat, mas una fauta a la recepcion d'un còp de pè de seguir provocava un avantatge estequit per Sydney: 8-6 a la pausa.
 
Canberra anava dominar lo segond temps, tornar a egalitat sus penalitat, mas capitava pas de puntar l'ensag alara que los Gals avián agantat un carton jaune. Fin finala, una contrataca de 90 mètres permetiá al melhor jogaire de la sason NRL, l'arrièr Tedesco de balhar la victòria a Sydney: 14-8 (amb la transformacion de Mitchell).
 
 
Championship: Toronto monta en Superliga
 
Pel compte de la finala del Championship, Toronto recebiá los tombaires del Tolosa Olimpic: Featherstone. Los angleses se'n daissèron pas comptar, mas finiguèron que pleguèron a l'ora de jòc per daissar filar los Lops en Superliga: 24-6 e provocar de copacaps als responsables per establir lo calendièr, vist que serà pas possible de jogar en Canadà en ivèrn!
 
En batent Newcastle 18-14, Oldam monta, en companhiá de Whitehaven (1r al classament), de League One en Championship.
 
 
Super League: los Diables roges de Salford en finala!
 
Quatre còps dins la sason, Wigan e Salford s'èran rescontrats. Quatre còps, los campions de 2018 avián ganhat. Divendres de ser, sus la pelena de Wigan, Salford s'impausèt largament 28-4 e validèt la bilheta per anar afrontar St Helens en finala aqueste dissabte 12 d'octobre de ser a Manchester. Logicament, St Helens es plan mai fòrt. Mas es ja çò que se disiá dels Sants abans la finala de la Cup perduda fàcia a Warrington. E òc, Diables contra Sants, aquò promet!
 
 
Viatges en Blau
 
Los Blaus U19 an jogat quatre partidas en Nòva Zelanda. Ganhèron las primièras doas: 32-28 contra Canterbury-U20 e 28-18 contra los Waikato-U20 e perdèron las doas seguentas: 44-26 fàcia als NZ-Residents, 38-26 fàcia a Auckland. Baissèron jamai los braces. L'an que ven, son los joves neozelandeses que vendràn en virada en Occitània e Catalonha.
 
De son costat, lo XIII de França feminin anèt batre las turcas 54-4 dissabte de ser.
 
 
En Africa, tanben
 
Per èsser complets, ajustarem que Nigèria ganhèt fàcia a Marròc 38-10 la primièra Copa d'Africa de rugbi de XIII, competicion qu'i prenián tanben part Cameron e Ghana.
 
 
 
 
Alan Roch

 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article