Sèm en plen temps dels rendètz-vos internacionals, plan lançats per la Copa del Mond de Rugbi de IX sus la pelena de l’estadi de Parramatta, dins la banlèga de Sydney.
 

A IX: Austràlia mai fòrta
 
Los Blaus descobrissián lo rugbi de IX; perdèron la primièra partida contra Liban, un còp de mai bèstia negra per nòstres Pols: 12-8; se tornèron faire la santat contra Galas 23-6, mas se prenguèron una brandida contra Anglatèrra: 38-4.
 
En mièja finala, Austràlia batiá Samoa 25-8 e Nòva Zelanda fasiá plegar los angleses: 22-6. En finala, los Cangorós s’impausèron: 24-10.
 
En femeninas, en contra, victòria de Nòva Zelanda sus Austràlia al tèrme d’una partida disputada: 17-15.
 
Los Blaus demòran en Austràlia per jogar doas partidas a 13 contra de seleccions localas.
 
 
Los Lions en virada
 
Los Lions Britanics demòran tanben dins l’emisfèri sud per disputar quatre partidas: aqueste dissabte 26 d’octòbre a Hamilton contra Tònga, puèi dos tèstes contra Nòva Zelanda: lo dissabte 2 de novembre a l’Eden Park d’Auckland, puèi lo dissabte 9 de novembre a Christchurch abans de rescontrar la Papoa-Nòva Guinèa lo dissabte 16 de novembre a Pòrt Moresby.
 
Aqueste divendres, lo 25, tripla aficha a Wollongong: França-Austràlia dels mens de 23 ans; puèi afrontament en femeninas e òmes entre Austràlia e Nòva Zelanda.
 
 
Baó ditz adieu a la Copa Aillères
 
En Elèit 2, aquesta dimenjada, se debanava lo primièr torn del Challenge Aillères, copa reservada a las esquipas de la categoria. Baó pèrd lo trofèu d’intrada del costat d’Entraigas que domina los catalans: 28-16. Dins lo dèrbi catalan, Pià elimina Illa: 30-14. Vilagalhenc-Argon fa la diferéncia dins lo segond temps per se qualificar fàcia a l’Escura: 46-26.
 
 
 
 
Alan Roch