Bandièra01 1180x150: Comuna de Tolosa

Actualitats

Dimenjada Magica per la represa en Elèit 1

Novembre: temps de represa dels entraïnaments pels Dragons Catalans e de represa de la competicion en Elèit 1

Aqueste dissabte 16 e aqueste dimenge 17, a Carcassona, la Dimenjada Magica dobrís la sason d’Elèit 1
Aqueste dissabte 16 e aqueste dimenge 17, a Carcassona, la Dimenjada Magica dobrís la sason d’Elèit 1
Rendètz-vos a Carcassona
 
Aquesta dimenjada, las 10 formacions d'Elèit 1 se traparàn a Carcassona per una dobertura de sason jos forma de Dimenjada Magica, amb doas partidas dissabte: Palau-Avinhon (15h30) e lo dèrbi Lesinhan-Limós (17h30); tres partidas dimenge: St Gaudenç-Tolosa (13h30), Albi-Vilanòva (15h30) e lo revenge de la finala passada Carcassona-Dragonets (17h30).
 
Bona novèla: la Federacion a trapat un difusaire de television per l'Elèit 1: la cadena TNT Via-Occitanie.
 
 
Elèit 2: los Lops de Roergue en cap de fila
 
En Elèit 2, Vilafranca pren lo cap de la competicion aprèp una larga victòria fàcia a Lion: 66-8. Seguisson a un punt Illa que bat Tolon:52-14; Pià que jogava pas e Carpentràs que bat Baó: 22-14.
 
 
Leons: lo bruèis despoderat
 
A Christchurch, los Leons tornavan trapar los Kiwis. En rason de nafraduras, los Leons presentèron una esquipa amb un mièg a l'ala e poguèron pas contrar lo vam neozelandés. Los Negres faguèron la diferéncia amb dos ensages dins lo primièr temps -Joseph Manu (12a), Shaun Johnson (33a)- per menar 16-2. e, amb un novèl ensag de Ken Maumalo tre la represa, mestregèron puèi la partida per ganhar 23-8.
 
Demòra als britanics una partida de jogar a Pòrt Moresby contra Papoa-Nòva Guinèa per acabar sus un punt positiu la virada. L'entraïnaire Wayne Bennet aurà pas fait de miracles e a de lagui de se faire per demorar al cap de la formacion, coma de la formacion anglesa que ven d'anonciar tres partidas contra Austràlia per la tardor venenta: a Bolton, lo 31 d'octobre; a Leeds, lo 7 de novembre; dins l'estadi de Tottenham, lo 14 de novembre.
 
 
Tònga: un jorn de fèsta nacionala
 
Aprèp la victòria de la setmana passada contra Austràlia, lo rei e lo govèrn de Tònga decidiguèron que, per assegurar la recepcion dels eròis, aqueste divendres 8 de novembre seriá un jorn caumat e de fèsta nacionala.
 
 
Fiji ganha de son costat la Copa d'Oceania amb una victòria sus Papoa 22-20
 
L'esquipa femenina anglesa ganha contra Papoa a Goroka davant 7000 espectators 24-10: lo segond tèst se jogarà en dobertura de la partida masculina.
 
 
 
La suspresa grèga
 
Lo darrièr participant europèu a la Copa del Mond de 2021 es conegut : serà Grècia mercé a sa victòria mai que neta en Serbia: 82-6.
 
De notar que los grècs an pas de federacion reconeguda per las autoritats d'Atenas que los voldriá integrar dins una autra federacion. Atal, los grècs joguèron lors partidas qualificativas a domicili a... Londres! Aquela qualificacion poiriá benlèu normalizar aquela estranha situacion.
 
 
Sonny Bill Williams de retorn
 
Lo grand jogaire dels dos rugbis torna sus las pelenas tretzistas:lo Sonny Bill Williams ven de signar per dos ans amb la formacion de Superliga de Toronto lo contracte que ne fa lo jogaire lo mai pagat de l'istòria (5 milions de dolars per an)!
 
 
Los Dragons se preparan
 
Aqueste diluns 4 de novembre, los Dragons, levats los que son retenguts per d'obligacions internacionalas, an représ lo camin de l'entraïnament. Aprèp lo dobertura australian James Maloney, lo davant anglés Joel Tomkins (fraire de Sam), lo retorn de Josh Drinkwater, los catalans an oficializat la signatura de l'alièr de Wigan: Tom Davies.
 
Entamenaràn la sason 2020 amb la recepcion d'Huddersfield lo 1r de febrièr. Lo dissabte 30 de mai, dobla partida a l'estadi Ernèst Wallon a Tolosa: Tolosa-Londres en Championship e Dragons-Leeds.
 
 
 
 
Alan Roch
 
 
 
abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article