Bandièra01 capçalera  1180x150: Novestivada

Actualitats

Hong Kong: un milion de manifestants e quatre cents detenguts

Malgrat que las protèstas duren dempuèi de meses, Pequin a pas fach cap de concession

| Hong Kong Free Press
Un milion de personas, segon los organizaires, participèron a la manifestacion de Cap d’an a Hong Kong en seguida de la crida facha pel movement pròdemocracia de la ciutat. La polícia ataquèt los manifestants amb de gases lacrimogèns e detenguèt aperaquí quatre cents personas. La manifestacion percorreguèt las carrièras principalas del quartièr financièr de la vila e lo principal airal de léser nocturn del temps que cridavan d’eslogans per la "liberacion" d'Hong Kong e mai per "la revolucion", çò rapòrta Hong Kong Free Press.
 
Qualques manifestants aluquèron de barricadas dins lo districte de Mong Kok e la polícia i respondèt amb de gases lacrimogèns e de canons d'aiga. Se passèt çò parièr al pòrt del temps que, dins lo quartièr del Prince Edoard, detenián de manifestants qu'avián alucat de candelas.
 
Lo cap de d’operacions de la polícia d’Hong Kong, Ng Lok-Chun, a atribuit los rambalhs a "un petit grop de susmautaires qu'utilizèron la violéncia per boicotar una marcha pacifica". A prepaus de l’arrestacion massissa de quatre cents personas, Ng a desmentit que foguèsson de detencions arbitràrias e a dich que cada cas seriá examinat individualament. Demest los detenguts, i a tres observaires del grop Civil Rights Observer, qu'a criticat las detencions en disent que viòlan los principis de Johannesburg.
 
L’Associacion dels Jornalistas d’Hong Kong a condemnat la dispersion policièra dels jornalistas que cobrissián las protèstas. Dins aquel sens, Ng a desmentit que la polícia empediguèsse lo trabalh dels jornalistas, en assegurant que los policièrs devián far un cordon de seguretat al moment de las detencions.
 
Malgrat que las protèstas duren dempuèi  de meses, Pequin a pas fach cap de concession. Lo govèrn chinés a solament acceptat sa desfacha a las eleccions localas, ont los candidats pròdemocracia ganhèron largament.
 
Las revendicacions dels manifestants se resumisson a cinc questions:
 
1. lo retirament complet de la lei d’extradicion devèrs China,
2. una comission d’enquista sus las brutalitats policièras,
3. l’amnestia per totes los detenguts,
4. que se considère pas los manifestants coma de criminals,
5. e d’eleccions liuras.

 





 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Be, en la foto que n'i a mai, se poden veire uns cinc mil joves com a màxim. Los 995. 000 restants se vesen pas, segur que i son mas en aquel moment la camara los a fotografiat a tots. Los altres eran anats a prendre un piscolapis que convidava la cia.

  • 1
  • 0

Escriu un comentari sus aqueste article