Bandièra01 1180x150: Comuna de Tolosa

Actualitats

Los italians son a elegir lor govèrn jos l’agach d’Euròpa

Las eleccions arriban après catòrze meses d’un govèrn tecnocrata. Los sondatges parlan d’una victòria de Bersani mas sens majoritat clara e amb un Senat ingovernable

Aperaquí 47 milions d’italians son estats cridats ièr e uèi a las urnas en las eleccions generalas mai observadas d’aquestes darrièrs tempses. Dins un contèxt de crisi prigonda en Euròpa, e mai de granda fatiga e desencantament en Itàlia après los darrièrs govèrns de Berlusconi e del govèrn tecnocrata de Monti (non elegit democraticament), aquestas eleccions se presentan coma decisivas per l’avenir, non solament d’Itàlia, mas de las politicas de tota l’Union Europèa. E mai, son d’eleccions viscudas amb inquietud perque los sondatges indican que lo país pòt venir ingovernable: la coalicion de centresquèrra, dirigida pel candidat del Partit Democratic, Pier Luigi Bersani, pòt obténer, segon los sondatges, 34% dels vòtes; lo centredrecha, amb Berlusconi davant, 28%; lo controvertit Movement Cinc Estelas (Movimento 5 Stelle), del comic Beppe Grillo, pòt arribar a 20% dels vòtes o quitament venir segonda fòrça; e la coalicion de Monti, entre 11% e 12%. Lo nombre estimat d’indecises es, en mai d’aquò, pus naut que jamai. Un sondatge publicat dimars passat estimava qu’entre 25 e 30% dels italians encara avián pas decidit lo sens de lor vòte.


Segon aquelas chifras, es clar que Monti auriá pas pro de vòtes per formar govèrn, ni amb Berlusconi ni amb Bersani. Per contra, Grillo be poiriá. Lo comic clavèt la campanha divendres amb un acte multitudinari a Roma, fòrça mai grand que l’ensems de totes los autres partits. Mas son discors d’antipolitica e sas fòrtas criticas dels partits tradicionals fan de mal imaginar qu’intre dins un ipotetic govèrn italian.
 
Divendres passat, Morgan Stanley explicava dins lo Financial Times qu’aquelas eleccions son “un eveniment de grand risc”. De son costat, Reuters disiá que “Roma s’alucarà cossí que siá dins las eleccions”. Se se pòt pas formar de majoritats o d’alianças dins lo Parlament e lo Senat, lo país serà ingovernable, çò qu’inquieta los mercats e las institucions europèas, que vòlon que lo nòu govèrn italian implemente las mesuras economicas començadas per Monti.
 
 
La clau del senat e la “porcariá”
 
Justament, Monti, que divendres clavèt la campanha dins un teatre de Florença, èra vist coma l’aliança perfiècha per que Bersani poguèsse formar govèrn. D’aquela manièra, lo centresquèrra recuperariá lo contraròtle del país e, de mai, auriá l’èx-primièr ministre coma sòci, e aqueste darrièr o metriá coma condicion per contunhar la reforma que son govèrn tecnocrata aviá començat.
 
Mas Monti a davalat en intencion de vòte aquestes darrièrs jorns e òm a paur que pòsca pas formar cap de majoritat solida amb Bersani. Tanpauc obtendriá pas un nombre fòrça elevat de senators, que serián pasmens decisius per poder dotar lo país d’una cèrta estabilitat. Lo Senat es una cambra clau en Itàlia. Tant, que lo darrièr govèrn de centresquèrra, dirigit per Prodi, tombèt sens aver pogut aprovar practicament cap de lei de las aprovadas al Parlament perque aviá pas de majoritat dins lo Senat.
 
Una de las rasons que las majoritats dins lo Parlament e lo Senat pòdon èsser talament desparièras, es la lei Calderolli, aprovada per Berlusconi en 2005 qualque temps abans las eleccions que perdèt contra Prodi. En prevesent sa desfacha, lo “Cavaliere” faguèt aprovar aquela lei que li assegurava lo contraròtle del país, e qu’es coneguda per totes coma la “porcariá” après que lo politològ Giovanni Sartori la nomenèsse en italian “porcata” o lei “porcellum”.
 
La “porcariá” o lei “porcellum” es la qu’establís la formula de despartiment dels sètis dins lo Senat. E, entre d’autras causas, establís que los partits que ganhen dins las regions de Venèt, Lombardia e Sicília obtengan un grand nombre de sètis en èxtra. Quand s’aprovèt la lei, Berlusconi e sos aliats ganhavan de longa dins aquelas tres regions. Mas ara lo scenari a cambiat: segon los sondatges, en Venèt ganhariá tornarmari Berlusconi, en Lombardia ganhariá Bersani, e en Sicília, Grillo.


Escandal en lo vòte de Berlusconi
 
L’escandal e la polemica acompanhan Silvio Berlusconi quitament a l’ora d’anar votar. Ièr, l’èx-primièr ministre e cap de lista del Pòble de la Libertat protagonizèt dos incidents dins lo collègi electoral. Lo primièr, quand tres activistas del grop feminista Femen intrèron en mostrant las popas e en cridant “Basta Berlusconi!” dins lo collègi electoral de Milan, tre qu’el votèt. “Femen demanda als italians qu’assassinen politicament lo mafiós e pedodil Berlusconi. Itàlia, vòtes pas per lo que deuriá èsser en preson!”, çò diguèt aquel grop quand revendiquèt l’accion.
 
Las tres joves femnas foguèron reprimidas amb de violéncia de la part de la polícia de Milan. Aiçò es lo vidèo del moment:
 

 
D’un autre costat, Berlusconi reganhèt una de las intervenentas del burèu ont votèt en li disent: “te cal aprene de sorire”. L’intervenenta fasiá mala cara quand vegèt que Berlusconi anava votar al burèu. Après lo gèst e las paraulas de l’ex-primièr ministre, restèt seriosa. Vejatz aqueste vidèo de La Repubblica:
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batko
1.

N'i a pas arren d'aténguer d'ua eleccion. Serà pas mei bon après. Los rics seràn hèra rics e los praubes cada còp mei praubes. N'i a pas que la democracia dirècta (la vertadièra) qui posca cambiar quauquarren. Aquò que necessita un federalisme.

  • 2
  • 0

Escriu un comentari sus aqueste article