Aqueste dimenge, a l’Estadium d’Albi, los Blaus an degut comptar amb la calorassa e amb lo vent per afrontar lo País de Galas dins una partida de preparacion a la Copa del Mond. Fàcia als Dragons Roges, Laurenç Fraissinós presentava una formacion amb 11 jogaires dels Dragons Catalans sul fuèlh de la partida. Los Blaus se mostrèron solides e solidaris en defensa, saupèron liberar las palmas; a l’entorn del tengut, Da Costa, Pelissièr o Rougé multipliquèron las iniciativas. Morgan Escarré, ara exiliat a Salford, es totjorn un electron liure que se ganhèt la designacion d’òme de la partida. Los Pols menavan 12-0 a la pausa, per una victòria finala de 34 a 10.
 
 
Las Blavas valentas, mas es pas pro…
 
Dissabte de vèspre a Warrington, las Blavas faguèron pròva de progression dins lor jòc, mas las anglesas faguèron tornarmai la diferéncia mercé a d’acceleracions que se trufèron de la defensa francesa, en particular sus la fin de la partida. La marca de 36-10 indica la diferéncia entre una formacion de jogairas que disputan un campionat estructurat e las Blavas que s’apièjan sus una competicion plan estequida. Ça que la, foguèt Laureana Biville que foguèt designada jogaira de la partida.
 
 
Los angleses ganhan
 
La formacion anglesa afrontava las Combined Nation All Stars. Lo còp passat, la seleccion dels jogaires dels antipòdes qu’evoluisson en Superliga aviá ganhat. Aqueste còp, los angleses ganhan 18-4 dins una partida que prenguèt jamai d’ample. L’arrièr dels Dragons e capitani de la seleccion, Sam Tomkins, passèt las 3 transformacions dels ensages angleses.
 
Dimenge, a Manchester, se jogava un rescontre de XIII-cadieral entre angleses e franceses. Los locals an ganhat 62-48.
 
 
En desplaçament
 
Pel compte de la Superliga, aqueste divendres 24, los tolosans jogaràn a Wigan.
 
Dimenge 26, los Dragons aniràn desfisar los Tigres de Castleford que son a la luta per dintrar dins lo grop dels 6 qualificats. Lo dissabte 2 de julh, los Sang e Aur tornaràn trapar Saint Helens a Brutus per una partida capitala.
 
 
NRL: de l’importància de l’entamenada
 
Dijòus 16, los Dragons susprenon los Lapinons en debuta de partida; marcan 6 ensages abans la pausa: 32-0 e gardan l’avantatge: 32-12. Divendres 17, los Vaquièrs an la victòria cò de Manly 28-26, alara que Melbourne ten a distància Brisbane 32-20. Dissabte, fàcia als Polets, Parramatta fa tanben la diferéncia dins lo primièr temps: 32-12 per véncer fin finala 32-16. Las Pantèras baton los neozelandeses: 40-6, alara que las Làmias baton logicament los Titans 18-10.
 
Dimenge, mercé a un ensag en tota fin de partida, Canberra bat Newcastle, 20-18. Los Dògols signan lor 4a victòria de la sason en marcant 6 ensages als Tigres: 36-12.
 
 
Un State sus terren nèutre
 
Se seguirà amb plan d’interès la segonda confrontacion de l’an de l’State of Origine que se tendrà aqueste dimenge 26 a Perth. Objectiu: pels Marrons confirmar, pels Blaus, ganhar lo dreit de disputar la bèla a Brisbane.
 
Aqueste divendres 24, a Canberra, se jogarà tanben l’State of Origine femenin.
 
E de mancar pas, aqueste dissabte, lo doble afrontament femenin e masculin entre Kiwis e Tònga a Auckland.

 
 
 
 
Alan Roch