Tant en Superliga coma en NRL, demòra pas mai qu’una jornada de campionat de jogar dins la fasa de classament abans de ne passar a las partidas eliminatòrias cap a las finalas del 24 de setembre a Manchester o del 2 d’octòbre a Sydney.

Superliga: pas lo temps de bufar…
 
Las 12 formacions de Superliga an encadenat doas partidas dins un relambi cortet. Joguèron dijòus o divendres, puèi dimenge o diluns!
 
Dijòus de ser, lo rescontre Tolosa-Dragons arremosèt mai de 9000 espectators a l’estadi Ernèst Wallon. Dins lo primièr temps, Yaha marquet tres ensages que permetián als vesitaires de menar 12-8 a la pausa. Dins lo segond temps, ajustèron dos ensages e los locals repliquèron per una sola realizacion. La victòria catalana 24-14 se clavava sus una dobla confirmacion:
   
Divendres de ser, Wigan se mostrèt mai actiu e mai collectiu que Saint Helens per ganhar 30-10 e prene data per un novèl rendètz-vos: la finala!
 
Lo camin de crotz del Tolosa Olimpic se perseguiguèt dimenge cò d’Hull FC (desfaita: 38-12) e s’acabarà dissabte cò del primadièr: Saint Helens.
 
Diluns, dètz mila espectators seguiguèron la partida decisiva entre los Dragons e Leeds a Brutas. Yaha se trapava descalat sus son ala dos còps e marcava; Dudson puntava en força al pè dels pals; Pearce ajustava un ensag sus una iniciativa personala e Joe Chan bonificava una palma arpatejada per la defensa dins l’en-but: 28-6 a la pausa pels Sang e Aur. Un primièr temps plan capitat amb una bona alternància entre lo jòc dels davants e lo dels tres-quarts, de solidaritat en defensa… Mas un anglés reconeis pas jamai la desfaita. Dins lo segond temps, Leeds marcarà dos còps, mas lo darrièr mot vendrà a Samisoni Langi per una victòria 32-18. Atal, los catalans jogaràn la partida de barratge lo divendres 9 de setembre a 8 e mièja del ser dins lor estadi fetiche.
 
Contra qui? Serà Salford, Leeds o Castleford. Dels 3, n’i a un de tròp. Salford a pres una seriosa opcion en anent ganhar a Castleford 50-10 e se deuriá qualificar en batent Warrington. Lo darrièr bilhet serà en jòc dissabte dins la partida Leeds-Castleford. Los Dragons clavaràn la fasa de classament tre divendres a Wigan (partida retransmesa per BeInSport)
 
 
NRL: Los Cavals Fòls a l’estable?
 
Los Bròncos de Brisbane coneisson una fin de sason complicada amb doas desfaitas sus lor pelena: 12-60 la setmana passada fàcia a Melbourne; 6-53 fàcia a Parramatta aqueste dissabte.
 
Atal, se trapan en 9a posicion al classament e veson Canberra (venceire de Manly: 48-6) se posicionar a la 8a e darrièra plaça qualificativa. Brisbane jogarà a Sant Jòrdi dissabte. Amai se ganhan, Canberra anirà, dimenge, rescontrar los Tigres en sabent çò que lor i demòra de faire per assegurar la qualificacion.
 
Un bon final per Canberra, mas una trista fin per Brisbane que passèt la màger part de l’an dins las primièras uèit plaças del classament.
 
Divendres, los Polets anèron ganhar 18-14 a Melbourne una partida de nauta intensitat amb qualques belugas nharrudas. Dissabte, dins una autra partida sarrada, los Lapinons faguèron plegar los Vaquièrs 20-10.
 
Divendres, Polets e Lapinons se traparàn per l’inauguracion de l’estadi renovat de Sydney. Las partidas d’aquesta darrièra jornada auràn una importància segura per l’establiment del tablèu de la fasa finala.
 
 
Rendètz-vos internacionals
 
Dins l’encastre de la preparacion de la Copa del Mond, l’esquipa de França de XIII-cadieral rescontrarà son omològa espanhòla aqueste dissabte 3 de setembre a Fitor (17h30).
 
Una partida d’una esquipa de França B (amb jogaires d’Elèit 1) es programada fàcia als Cavalièrs angleses (formacion d’espèrs) lo dissabte 1r d’octòbre a Merinhac.
 
 
 
 
Alan Roch