Bandièra01 capçalera  1180x150: Novestivada

Actualitats

Rugbi de XIII: en Copa del Mond, Anglatèrra e Austràlia en demostracion

Los fijians dobrisson la marca fàcia als Cangorós
Los fijians dobrisson la marca fàcia als Cangorós | RLWC

Tèxte legit

A Newcastle, dissabte passat de vèspre, se joguèt la primièra partida de la Copa del Mond de… 2021! Anglatèrra rescontrava Samoa. Se pensava que Samoa se podiá apiejar sus sos jogaires estampilhats NRL per pausar de problèmas als angleses. Los primièrs punts de la competicion foguèron marcats per Tonny Makinson sus penalitat e a la pausa los angleses menavan 18-6. Lo segond temps foguèt un long calvari pels jogaires del Pacific despassats pel vam dels jogaires de la Ròsa. A la sortida, dètz ensages encaissats e una marca de 60-6 pels angleses que s’anóncian coma d’adversaris de primièra pels australians.
 
Una Austràlia qu’afrontava en serada Fiji a Leeds. Los fijians marcavan lo primièr ensag, mas la maquina cangoró se metèt a l’òbra e profeitèt de totas las escasenças per faire la diferéncia: 42-8.
 
Dimenge, oposicion de semblança europèa entre Escòcia e una Itàlia formada de plan de jogaires qu’evoluisson en Austràlia: victòria italiana 28-4.
 
Jamaica faguèt sa primièra aparicion dins l’istòria de la competicion mondiala fàcia a Irlanda que ganha pro ben aisidament 48-2.
 
La Nova Zelanda rescontrava los libaneses. Liban dobriguèt la marca, mas mercé als impactes de son paquet e a las iniciativas de sos arrièrs, los Kiwis s’impausèron 34-12.
 
 
França se balha de rasons d’esperar
 
Diluns de ser, a Doncaster, França rescontrava una formacion grèga sostenguda pels espectators angleses. Aplicant las consignas de l’enquadrament, amb un gròs trabalh defensiu, amb los ensages de Dezaria, Gigòt e Jullien, los 3 transformats per Morgue qu’ajusta una penalitat, los Pols menan 20-0 a la pausa. Morgue marca un ensag que transforma. Los grècs marcan a l’ora de jòc. Aprèp una novèla penalitat encapada, Julien torna marcar. Los grècs marcan abans la còrna e França ganha 34-12.
 
Mission complida, mas lo mai dur demòra de faire. La qualificacion pels quarts passa necessàriament per una novèla victòria, siá contra los angleses (invencuts dempuèi 1991) aqueste dissabte, siá contra Samoa, lo dimenge 30 d’octòbre.
 
 
Elèit 1: lo dèrbi reviscòla Lesinhan
 
En cap d’aficha de la tresena jornada del campionat d’Elèit 1, se disputava lo dèrbi al Molin entre l’FC Lesinhan e Carcassona. Suspresa: los Canaris passèron al costat del match e gaitèron evoluir los Molinièrs mai entreprenents que desjògan los pronostics e s’impausan 22-6. A Vilanòva, los limosencs marcan dos ensages d’entrada e ganhan 40-26. Avinhon deu esperar la fin del rescontre per s’impausar fàcia a Pià: 28-14. Partida de sens unic a Albi ont los Tigres manjan tot crus los tolosans: 42-2. St Gaudenç encadena una segonda victòria en dominant los Dragonets 36-20.
 
 
 
 
Alan Roch

 
 


abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\\\'Alan Carcassona
2.

Aqueste dimècres de ser, a Leigh, las Illas Cook baton Galas : 18-12.

  • 0
  • 0
L\'Alan Carcassona
1.

Aqueste dimars de ser : Tongà : 24- Papoasia : 18.

  • 0
  • 0

Escriu un comentari sus aqueste article