Bandièra01 1180x150: Comuna de Tolosa

Actualitats

Irlanda del Nòrd: lo Sinn Féin s’impausa clarament a las eleccions municipalas

Amb aqueles resultats revendica la restitucion de las institucions nòrd-irlandesas, suspendudas pel Partit Democratic Unionista arunan

Tèxte legit

Lo Sinn Féin s’es clarament impausat a las eleccions municipalas que se tenguèron dijòus passat a l’Irlanda del Nòrd, en emportant lo nombre pus grand de sètis en jòc demest los onze conselhs municipals de la província: 144 sus 462, çò es 39 conselhièrs municipals de mai a respècte de las eleccions localas de 2019. Ara lo Sinn Féin, partit per la reünificacion d’Irlanda, revendica aqueles resultats coma una demostracion del sosten popular a la restitucion de las institucions provincialas nòrd-irlandesas, suspendudas pel Partit Democratic Unionista (DUP), e mai foguèsse obligat de governar en coalicion amb lo Sinn Féin.

Fa un an que los unionistas del DUP blòcan lo poder executiu per s'opausar a las règlas comercialas impausadas après lo Brexit, que menaçan segon eles los ligams de la província amb la rèsta del Reialme Unit. Mas aquel boicòt de las institucions localas, supausadas èsser partejadas amb los republicans del Sinn Féin en vertut de l'acòrdi de patz signat en 1997, rend impossible tot vòte del budget pel territòri e empacha la cap del Sinn Féin, Michelle O'Neill, d’assumir sas foncions de primièra ministra. Après la publicacion dels resultats del vòte, O’Neill a declarat a la BBC que son partit “redoblariá d'esfòrces per restablir lo poder executiu”.

En mai d’aquò, lo Sinn Féin es a l’ora d’ara lo primièr dels sondatges en Republica d’Irlanda per las eleccions nacionalas previstas en 2025, segon Reuters.

 

 

 

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

"S'impausar clarament", amb 144 municipalitats sus 462 ? Es a pauc près çò que Macron apèla "la majoritat", non ? Un elector inscrit sus quatre li es estat favorable — sense parlar del fait qu'èran, sos electors, per una bona part, subretot desfavorables a l'extrèma-drèita… Las chifras aicí donadas semblan indicar una "majoritat" correspondent a un pauc mai de 3 municipalitats per 10 en tot. O ben l'article manca d'informacions, o ben, coma Macron, son autor non a pas la meteissa nocion de "s'impausar clarament" que ieu. Per ieu, s'impausar clarament, seriá estat quicòm coma, al mens 6 comunas per 10. "La majoritat", es quand n'i a mai, non ? Aquí auriái emplegat l'advèrbe "clarament" e lo vèrbe "s'impausar"… Benlèu la bona formula seriá estada "progressar clarament", en liurant chrifras actualas e chifras passadas ? De tot biais, lo vèrbe "s'impausar" m'es clarament hollando-macronian. En democracia vertadièra, degun non "impausa" res : cadun i "prepausa", puèi la majoritat ne conven o non ne conven, continuadament ; senon, aquò non se pòt onèstament pretendre "democracia".

  • 5
  • 2

Escriu un comentari sus aqueste article