Bandièra01 1180x150: Comuna de Tolosa

Actualitats

Es mòrta Tina Turner a 83 ans

“Lo Mond pèrd una legenda de la musica e un modèl de seguir”, çò a dich son agéncia de representacion

Es mòrta Tina Turner a 83 ans
Es mòrta Tina Turner a 83 ans

Tèxte legit

La cantadora estatsunidenca Tina Turner es defuntada dempuèi aqueste dimècres 24 de mai de ser a 83 ans. Èra considerada coma una de las grandas legendas de la pòp dempuèi los ans 1980 e èra famosa per sos concèrts energics.

“Tina Turner, la reina del rock’n roll es mòrta pacíficament a ochanta tres ans après una longa malautiá dins son ostal de Küsnacht, en Soïssa”, çò raportava son agéncia de representacion en apondent que “lo Mond pèrd una legenda de la musica e un modèl de seguir”.

Nascuda Anna Mae Bullock al sen d’una familha paura de l’estat de Tennessee, comencèt sa carrièra musicala amb son primièr marit, Ike Turner. Puèi, après patir de violéncias conjugalas, contunhèt son activitat en sòlo e venguèt celèbra per la sortida del disc Private Dancer en 1984, amb de cançons de succès mondial coma What’s love got to do with it, The best o ben Let’s stay together.

Long d’una carrièra que durèt mai de cinc decennis, Turner a vendut 200 milions de disques dins lo Mond entièr.

Se retirèt en  l’an 2000 mas tornèt en 2008 suls emponts amb la virada Tina! The 50th anniversary tour, que venguèt una de las mai rendablas de l’istòria.

En 2013, Turner aqueriguèt lo ciutadanatge soís e renoncièt a la nacionalitat estatsunidenca, en confirmant que se retirava definitivament de la musica. En 2016, li diagnostiquèron un càncer de budèl e en 2017 li transplantèron un ren.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan Francés Blanc Estrasborg
1.

Benlèu l'Alan Roch nos parlarà de las amors de la Tina Turner e del rugbí de XIII...
https://www.theguardian.com/sport/blog/2023/may/25/tina-turner-simply-the-best-song-rugby-league-ad-campaign-nrl-commercial

  • 4
  • 1

Escriu un comentari sus aqueste article