Un estudi elaborat per de scientifics de l’universitat estatsunidenca de Chicago revèla que los dalfins an la memòria sociala mai granda que s’es jamai enregistrada dins tot lo mond animal. Segon aquel trabalh, los dalfins son capables de reconéisser un congenèr e mai se fa un vintenat d’annadas que se son pas vistes.
 
An fach l’estudi amb un quarantenat de dalfins de sièis pargues aqüatics, qu’avián conviscut inicialament entre eles, mas que lors destinacions foguèron desparièras. Malgrat las annadas, los dalfins reconeissián los fiulets enregistrats dels dalfins qu’avián conviscut amb eles, qu’òm lor fasiá escotar. Lo cas mai extrèm foguèt lo de dos dalfins separats quand avián dos e quatre ans d’edat, e que vint ans e sièis meses puèi, reconeguèron los enregistraments dels fiulets amb los quals comunican.
 
De fach, la reconeissença sociala dels dalfins pòt durar mai que la reconeissença faciala dels umans, pr’amor que las caras càmbian mas lo fiulet d’aqueles animals es tostemps lo meteis.
 
“Es demostrat que los dalfins trabalhan cognitivament a un nivèl fòrça coerent amb la memòria sociala dels èssers umans”, çò diguèt lo director de l’estudi, Jason Bruck.