L’Universitat Pau Valèri de Montpelhièr ven d’anonciar la creacion d’un prèmi literari dels estudiants d’occitan. Es una iniciativa novèla del departament d’occitan que vòl metre en valor la creacion contemporanèa en pròsa e desvelhar l’interès dels estudiants per la literatura occitana actuala.

Lo guierdon serà atribuit per una jurada compausada dels estudiants de la seccion, que causiràn lor òbra preferida entre cinc libres seleccionats, totes publicats en 2023 o 2024. La preseleccion foguèt facha pels ensenhaires après una crida als ostals d’edicion pendent l’estiu passat.

Los cinc libres en competicion representan una bèla diversitat lingüistica e editoriala, amb quatre variantas (gascon, lemosin, lengadocian e provençal) e cinc editors diferents (IEO 06, IEO 34, L'Aucèu Libre, IEO Novelum e Reclams). Lo prèmi met tanben en lum una preséncia femenina importanta dins la creacion literària occitana de uèi, amb tres autoras demest los cinc candidats.

Los seleccionats son:

• Magali Bizot-Dargent, Novèlas sornas (IEO 06)
• Micheu Chapduelh, Las set filhas dau Diable (IEO Novelum)
• Miquèla Stenta, Cronica de quauques jorns ordinaris (L'Aucèu Libre)
• Fabienne Vayrettes, E víver (Reclams)
• Florian Vernet, Anamorfòsis (IEO Erau)

Lo prèmi serà remés oficialament a Salinèlas (Garrigas) aqueste dissabte 17 de mai, dins l’encastre del Total Festum, en preséncia dels estudiants que n’auràn causit lo laureat.