Bandièra01 1180x150: Comuna de Tolosa

Actualitats

Crida de Macarèl a l’economia regionala, solidària e responsabla

La petita entrepresa de produches pel país demanda de manlèus al 2,5% per téner la botiga de Tolosa

| Macarèl
L’entrepresa de merchandising occitanista Macarèl fa una crida a la solidaritat. Per poder téner la botiga a Tolosa devon pagar un pas de pòrta de 150 000 èuros abans lo 6 de febrièr. Pr’amor que s’agís d’un temps plan brèu per amassar tot aquel argent, lo capmèstre de la societat, Danís Cantornet, a decidit “de recórrer a l’economia regionala, solidària e responsabla e de far un manlèu al taus de 2,5%, que serà remborsat en 7 ans, cada debuta d’annada”.
 
Téner una botiga al centre de Tolosa es un afar important, pas solament per l’avenir de Macarèl, mas per la difusion de l’occitanitat. “Un punt de venda dins la Ciutat Mondina atrai de mond d’11 departaments, mas tanben de mai de forestièrs”, çò afirma Cantornet.
 
Macarèl a tengut la botiga a la Carrièra del Taur pendent dos meses, e dins aquel periòde d’ensag “las chifras an mostrat que Macarèl s’i deviá installar de longa. D’efièit, sus aquela pontannada, la chifra d’afar i representèt los 3/4 del de la botiga de Sant Joan de Vedats, e la mitat de las vendas sus Internet en una annada”.
 
Val lo còp de poder prestar aquel argent a la societat de produches del país, dins la lenga del país, per la consciéncia del país. L’an passat, la chifra d’afar globala de la petita entrepresa capitèt de pojar de 2,5% dins un encastre de crisi. “Çò que mòstra plan que los sentiments d’identitat e l’estacament a la lenga son a créisser.”
 
Jornalet es desolat de poder pas prestar d’argent, tant que sèm de benevòls que quitament pagam per far cada jorn aqueste jornal. Mas cresèm qu’es plan important, per la difusion de la consciéncia nacionala occitana, que Macarèl tenga sa botiga al centre de Tolosa. Es per aquò que publicam aquesta nòva e encoratjam lo mond que pòscan a lor prestar la soma que siá necessària.
 
Podètz sonar al +33 (0)6 12 25 42 26 o escriure per e-mai a: contact@mac....

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Laurenç Gavotina
11.

#7 "avèm pas jamai agut qualqu'un plan intencionat per nos prepausar de far las reviradas..."

pensèro que quitament una associacion que fa de corses d'occitan per adultes poiria aver coma tòca pedagogica de revirar totas/qualquas pàginas dal francés a l'occitan. Un exemple practic d'utilizacion de la lenga, visibla e valorizanta. Manca plus que d'o far saber per trobar lo monde interessat.

  • 2
  • 0
Cédric Rousseu Tolosa
10.

Darrière question Evalina, coma sias pr'aici (simpla curiositat personala) per de que avetz pas ensajat tanben de passar per un plan de la mena Ulule o kisskissbankbank ?

  • 6
  • 0
Cédric Rousseu Tolosa
9.

#4 1) A la limita òm pòt considerar aquel article coma una presa de pausicion editoriala a favor, mas es assumit (lo ton es balhat dins la frasa de conclusion) mas pas coma una reclama

2) Podi entendre l'enveja autosatisfasenta de veire un site en occitan pels qualques astroses que sabon legir la lenga (e òc es pas lo tot de passar la vida de plorar al respecte dels locutors naturaus, mas los 3/4 sabon pas legir), aprep dirai per esser passat sus la botiga Macarel de Tolosa mantunes còps (òc un jornalista torna mantunes còps sul luòc dels criles) aver posgut constatar que la lenga era presenta a l'escrich, mas subretot que se parlia la lenga, pas dins un ambient de capèla religiosa de monde iniciats que parlan la lenga, mas d'un biais naturau, amistos a tal punt que vejeri pas (al mens quora i passeri) de monde non occitanofònes s'espaurugar de dintrar dins la botiga, coma es de còps lo cas dins d'endreit onte se parlan la lenga que lo monde non locutors an paur de visitar per paur de s'i sentir forastièrs... Es una question de punt de vista, mas personalament me sentissi mielh per ma lenga quora l'ausissi rajar dins un endreit que quora la vesi cristalisada a l'escrich dins un site, coma empalhada... Se las gens volon legir d'occitan, i'a sites força plan per aquò, de mon vejaire se qualqu'un va sul site de Macarel es per crompar....
Aprep benleu es aici lo probleme que vos truca, la risca de veire vendre produches que fan reclama per l'oc a monde non occitan e aital d'interessar mai de monde e de prener la risca de mesclar la sang blosa occitana ? Se es lo cas lo cal diser e assumir clarament, mas vos preveni dins aquel cas anem cambiar de contesta e pensi que lo ton (lo meu en tot cas) sera mens manhac....

  • 6
  • 0
Cédric Rousseu Tolosa
8.

#3 La contesta sus l'informacion generalista e qualitosa es una vasta contesta, lo problema essent de contentar totun (causa impossible) e de dispausar dels miegjans (umans entre autres e financiers que van amb) per aquò faire. Aprep la question de parlar o pas de las causas occitanistas, l'entendi, es estada mon còr de mestièr pendant un bel temps, e sus aquò pensi amb lo recuòl que se cal pas faire un papier a cada còp qu'un calendron far un dessenh, se cal pas tanpauc forabandir d'escriure sul subjecte se sembla pertinent, e onestament per aver tanben seguit coma jornalista (e sem estat nombroses que sia de la premsa occitan o de la PQR) aquel afar Macarèl me sembla interessant : d'un punt de vista generalista francament per me passejar fòrça dins la ciutat mondina amb la femna e lo nenet, vesi gaireben cada mes, subretot carrièra Sant-Roman e carrièra del taur, nòvas botigas dubrir e botigas tampar. Quora ai entrevistat lo monde de Macarel erem qualques jornalistas d'ausir lo Danis nos balhar las chifras qu'i caldria tenir per gardar la botiga de s'agachar en tot se diguant "es calùc lo tipe, i va daissar la santat" e pr'amor d'aquò a capitat e vòl continuar en usitant un modele pas tant costumièer qu'aquò : l'informacion me sembla pas tant occitano-occitanista qu'aquò (pensi a mai que se i capitan, ço que lor desiri, coma Tolosa es un vilatge onte tot se saps, pensi que dins los primiers temps de dubertura, va i'aver molon de gens que los van venir visitar, mai per coneisser la recepta per montar aquela mena de projecte que per crompar material......

  • 6
  • 0
Houlès Evalina Castras
7.


Ara ma responsa a l'anonim - que lo coratge de marcar son nom l'escana pas ...- Lo nòstre siti es pas (encara) en occitan per mai d'una rason : la 1ra es que la màger part dels clients de Macarel sabon pas legir l'occitan, e en mai parlan pas la lenga. Coma los occitanistas representan pas que 1% de los que crompan, es a dire de los que fan viure Macarel, lor daissam la tòca de far l'educacion dels occitans non-occitanofòns : que fagan espelir fòrça Calandretas, escòlas bilingas e que balhen corses als adults . Quand auràn capitat d'occitanisar lo pòble e de socialisar la lenga, adaptarem lo siti.
La 2da rason es tecnica : nòstre albergaire es agràtis e sèm limitats pel nombre de letras e de mots que podèm emplegar sul siti, pel moment avèm pas encara solucionat aquel problèma . Enfin, la 3na rason es umana : trabalham entre 12 e 14 oras per jorn per far virar Macarel e nos demorariá pas de temps de tot biais per revirar tot çò que i a sul siti .Causa estranha : avèm pas jamai agut qualqu'un plan intencionat per nos prepausar de far las reviradas...
Per çò que tòca " Macarel es pas cap d'associacion culturala que trabalha per la lenga ni res aital. " onèstament, i a d'emplastres que se pèrdon ! Se nautres trabalham pas per la lenga, de qué fasèm ?!!! Sèm fièrs a Macarel d'aver ajudat a socialisar la lenga : amb los milierats de pegasolets suls carris, amb los camisets, avèm obrat a tornar metre l'occitan al còr de la vida vidanta - e en grafia normalisada, çò qu'es pas estat totjorn aisit de far passar- Fièrs tanben d'aver produsit una mapa d'Occitània bèla. Fièrs encara de trabalhar a l'ora d'ara sus un imatgièr pels pichons que fa mestièr dempuèi d'annadas. Sèm pas una associacion culturala, e es justament perque dependèm pas de subvencions que podèm ajudar d'associacions occitanas a las escanas : cada an, balham entre 20 000 e 30 000€, jos forma de dons e de remesas. E l'anonim moralisator, de qué fa ,el , levat criticar los que se lordejan las mans ?...

  • 16
  • 1

Escriu un comentari sus aqueste article