Un autre sisme a tornat gigotar tot lo nòrd d'Itàlia. Lo tèrratrem s'a debanat a nòu oras del matin e es estat de 5,8 gras segon l'escala de Richter. Las agéncias de premsa italianas parlan d'almens setze mòrts e de qualques bastissas estartalhadas, mai que mai aquelas qu'èran afectadas pel tèrratrem de qualques jorns fa. Lo cònsol de San Flis (San Felice sul Panaro) , Alberto Silvestri, a dich que de divèrsas personas son mòrtas en s'estartalhar una usina.


 


Los mèdias italians an informat que los pompièrs cercan de mond que son demorats atrapats dins los esbauçaments a San Flis e La Miràndla (Mirandola).

 



L'epicentre es plaçat tornarmai a Finàl (Finale Emilia), dins la província de Modena, 40 quilomètres al nòrd-oèst de Bolonha, e 60 Km a l'èst de Parma. A Bolonha de mond son estats deslotjats de nombrosas bastissas publicas.