Bandièra01 1180x150: Comuna de Tolosa

Actualitats

França a lançat un plan per consolidar e far créisser l’imposicion del francés en Africa

| Abdallah
Dijòus passat, 20 de març, Jorn Internacional de la Francofonia, l’estat francés lancèt un projècte nomenat 100 000 Professors per Africa, qu’a un budget de 4 milions d’èuros per tres ans e qu’a per tòca de contunhar e consolidar l’imposicion de la lenga francesa en Africa.
 
“En Africa una corsa de velocitat es engatjada entre creissença demografica e creissença educativa e cal qu’aquesta darrièra ganhe”, çò diguèt lo ministre francés dels afars estrangièrs Laurent Fabius, que calcula qu’en 2050, aperaquí 500 milions de personas poirián èsser de locutors del francés.
 
Lo ministre planh que lo mestritge del francés es a se degradar, e qu’en reaccion cal sustot “accionar una dinamica” e “emplegar totas las possibilitats del numeric per ensenhar lo francés”. De fach, amb aquel projècte, se formarà dins l’estat francés de tutors qu’enquadraràn en seguida e a lor torn de professors d’universitat e que desvoloparàn d’espleches de formacion a distància.
 
Los primièrs païses tocats seràn la Republica de Còngo, Nigèr, Tògo, Mali, Madagascar, Marròc, Zimbabwe e Ghana, ont l’Institut Francés, qu’es l’operator de l’accion culturala de França a l’estrange, coordenarà dètz missions dins los departaments universitaris d’ensenhament del francés. Dins aquel sens se son dessenhats qualques espleches cibernetics de ressorsas pels ensenhaires de la lenga d’oïl.
 
Africa es “lo continent on se jogarà l’avenir de la nòstra lenga”, çò declarèt la ministra francesa delegada a la francofonia, Yamina Benguigui.
 
A l’ora d’ara, en Africa se parla aperaquí 1500 lengas de quatre grandas familhas lingüisticas: l’afroasiatica, la nigèrocongolesa, la nilosahariana e la khoisan. Mas al delà de las lengas autoctònas, en Africa se parla anglés, francés, portugués e espanhòl coma consequéncia de la colonizacion. Amb l’independéncia de las colònias, mantes estats africans contunhèron d’aver la lenga europèa coma lenga oficiala. Dins aquel sens, França es una de las poténcias colonialas que mai s’afana per i manténer l’emprenta de sa colonizacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gapian Gap
5.

#4 exactament lo meme constat d'un jove cameronés, sap pas parlar autra causa que francés, au contrari de totes los mai eatjats de sa familha que son bilingues, e los vielhs vielhs, monolingues en lengas autras que francés (francés que comprènon a pena).

  • 7
  • 0
Castel Mathieu Marselha
4.

#3 Òc, as rason. La tendància vouguent pasmens, e va sabem pron ben, que lo francés prendrà pauc a cah pauc de part de locutors. Ai l'exemple d'un amic de Còsta d'Ivòria, naissut ailat e arribat en França l'a un detzenat d'annadas qu'a solament lo francés per lenga mairala, au còntre de sa familha que parla Senoufo. E segon eu (qu'a pas exactament la mesma vision que nautres ;) ), l'aurà de mai en mai de personas dins son cas dins leis annadas venentas.

  • 15
  • 1
N. Eynaud Lo Martegue
3.

#2 Aquel estudi a un problema de metòde car considera cada abitant d'un país oficialament francofòn coma locutor dau francés, çò qu'es pas lo cas (ex : Guinèa Eqüatoriala a lo francés coma lenga oficiala mai solament 10% de la populacion l'estudia a l'escòla e mens de 2% lo parla). Pasmens segon d'autreis estudis pus precís, es possible que lo francés sigue la tresena lenga pus parlada vèrs 2050 après lo mandarin e l'anglés (ò l'anglés e lo mandarin).

  • 10
  • 0
Castel Mathieu Marselha
2.

D'estudis, a tot lo mens un, veson ja lo francés coma la lenga la mai parlada dins lo monde en 2050, gramací l'explosion demografica de l'Africa francofòna e partent de l'idèa qu'a cha pauc, lo francés "manjarà" lei lengas localas.

Es pas tant marrit fin finala per una lenga amenaçada per la reconoissença de lengas dangeirosas e totaliràrias coma l'occitan, lo basco, lo còrs, lo breton, etc...

  • 14
  • 0
N. Eynaud Lo Martegue
1.

4 milions d'èuros per tres ans per 100 000 professors siá... 13 € / an / professor. Se lo francés veirà probablament son ròtle de lenga veïcula renfòrçat dins leis annadas que vènon — a ja aqueu ròtle dins la màger part deis ancians empèris francés e bèlga e certaneis estats, especialament Nigèria, son tanben favorables per son desvolopament per integrar lo mercat format per l'Africa francofòna — aqueu projècte sembla èsser subretot una declaracion d'intencion e una afirmacion novèla de l'influéncia francesa sus lo continent. Pas una realizacion vertadiera.

  • 13
  • 1

Escriu un comentari sus aqueste article