Actualitats
Kyiiv a començat una “operacion antiterrorista” a l’èst del país e a demandat ajuda a l’ÒNU
Fa mai d’un jorn que s’es acabat l’ultimatum del president interimari ucraïnés, Oleksandr Turchynov, als separatistas pròrusses qu’an ocupats qualques edificis publics dels païses de Donetzk e Luhansk e que vòlon l’independéncia o l’annexion a Russia. A l’ora d’ara se son pas renduts. Turchynov auriá signat un decret per lançar contra eles una operacion antiterrorista. Lo govèrn de Kyiiv mantenguèt una conversacion telefonica amb lo secretari general de l’ÒNU, Ban Gimun (Ban Ki Moon), per ensajar de menar a tèrme una eventuala operacion amb las fòrças de patz de l’ÒNU que son a la Mar Negra.
Mas Ban Gimun a remembrat que tot emplec de las tropas de l’ÒNU a de besonh de l’aprobacion del Conselh de Seguretat, que Russia n’es membre permanent.
D’un costat, Ban Gimun a felicitat la “moderacion” qu’an mostrada las autoritats interimàrias ucraïnesas pendent lo conflicte. Mas de l’autre a exprimit son “chepic” per las informacions que dison que “dels dos costats del conflicte son a armar de civils”. Dins aquel sens insistiguèt sus l’importància d’evitar “quina confrontacion militara que siá”.
Kyiiv vòl pas una nòva Crimèa dins las regions orientalas d’Ucraïna, e per aquò a decidit d’èsser mai menaçant e de passar a l’accion en Donetzk e Luhansk, que dins los darrièrs jorns, las protèstas pròrussas se son multiplicadas.
Lo govèrn ucraïnés acusa los servicis d’espionatge russes de participar activament a la “revòlta separatista a granda escala”, dison que n’an de pròvas que presentaràn lo 17 d’abril a la reünion de l’ÒNU a Genèva. Dins un comunicat del Ministèri de l’Exterior ucraïnés, s’assegura que la tòca de Moscòu es de prene lo poder, de destabilizar la situacion e de separar aquelas regions de l’estat ucraïnés. En mai d’aquò, lo primièr ministre ucraïnés a acusat Moscòu quitament d’aver declarada la guèrra a Ucraïna.
De son costat, Russia assegura qu’a pas cap d’intencion d’envasir Ucraïna, e mai s’acusa lo govèrn interimari del país, que prenguèt lo poder en seguida de protèstas similaras a las qu’ara acusan de terroristas. Lo Cremlin a prepausat al govèrn de Kyiiv d’aprovar una nòva constitucion ont Ucraïna venga un país federal, d’oficializar la lenga russa e de reconéisser Crimèa coma partida del territòri rus.
Turchynov a prepausat mai d’autonomia per aquelas regions que protèstan, amb lo renovelament dels govèrns locals.
Parallèlament, al nivèl diplomatic, los caps de l’Union Europèa son a preparar una reünion per aplicar de nòvas sancions a Russia, après s’amassar ièr diluns a Luxemborg. Ailà, los vint e uèch condemnèron l’ocupacion d’edificis de la part dels manifestants pròrusses; e la cap de la diplomacia europèa, Catherine Ashton, a demandat a Russia de retirar las tropas de las frontièras.
L’UE a engrandit tanben la lista de las personas sancionadas per malversacion de fonzes publics ucraïneses, que lors noms se publican uèi dins lo Jornal Oficial de l’UE.
Lo Conselh de Seguretat de l’ÒNU s’amassèt dimenge passat sens portar cap de solucion al problèma. Russia acusa lo govèrn ucraïnés de desplegar l’armada contra los manifestants que protèstan, en tot promòure una guèrra civila en Ucraïna, del temps que l’OTAN avertiguèt Russia qu’una nòva intervencion militara solament fariá aumentar son isolament internacional.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 Uèi es pas clar, se sap pas se i a pas agut de desercions del costat dels tancs ucraïnians que d'unes portavan la bandièra russa (se ditz que podriá èsser una estrategia mas...)...
Vos boti la vidèo del tanc que ne parlavi; bon es un pauc/pro risolièra malgrat la gravetat de la situacion: http://www.youtube.com/watch?v=7lujfPiPMP8
#1 Adieu a totes,
L'afar es plan complicat que Ucraïna es en granda part una construccion artificiala, acceptada (globalament) pasmens per totes los pòbles qu'i vivon de lenga ucraïniana, russa o autra. E puèi a la realitat istorica s'apond lo fach que i aguèt de desplaçaments de populacion dempuèi un brave temps e exacerbats jos l'Union Sovietica que portèt de russes un pauc de pertot (en Moldàvia e dins los païses baltics per exemple ont demòran de minoritats que pòdon representar 15%, disi aital es una chifra que domini pas, dins qualques cases de l'entorn de la mar Baltica).
I auriá probablament una legitimitat se l'autonomisme o l'independentisme dels airals de l'èst foguèsse pas globalament flac (pensi qu'es a l'entorn de 15% dins lo cas mai naut, vos trobarai las enquèstas se cal...; en Crimèa èra mai important a l'entorn de 30% cresi...) mas en realitat es quicòm de plan complèx, globalament una manipulacion dels poders locals (Partit de las Regions, lo partit de Ianokòvych e dels oligarcas coma Rinat Akhmètov) apiejats evidentament per la Russia potiniana...
Lo contingent pro-rus doncas se compausa de militants locals, sovent d'orbita fascistizanta, apiejats/incitats pels poders locals (Partit de las Regions e oligarcas) e gerits discretament pels poders russes a distància o sul terrenh (an ja trobat de pròvas claras de la preséncia russa coma aicí: https://twitter.com/lachecarlo/status/456181455014469632/photo/1; demest mantuna autra causa...
Cal saber tanben qu'a aqueste contingent s'apond de gents pauras que son pagadas per manifestar o far pièger; se ditz qu'ocupar un local seriá pagat 500$ (la practica del pagament es abituala durant las manifestacions e pensi que dins cada costat mai o mens; pasmens actualament del costat pro-ucraïnian son mai o mens espontanèas...)
A aquesta conjontura desfavorabla s'apond lo fach que lo poder ucraïnian èra pas preparat per far una guèrra, son cap es un banquièr e ensajan de sortir lo país de la quincanèla... l'armada es facha de petaces (se cal vos pòdi ensenhar un tanc ucraïnian, una cranca, que se fa atacar per de pro-russes en lada!!!) amb la possibilitat d'aver d'espionasses e de traites dins son interior... Aprèp d'aver trantalhat e fach milanta ultimatums que respectèron pas, se son finalament avisats, jos la pression del pòble amassat ièr davant lo Parlament que caliá intervenir militarament e l'afar sembla d'anar pro plan per ara... esperem que contunhe e que pòscan recuperar lo territòri perdut... Crimèa serà mai complicat pr'aquò! Slava Ucraïna!
Bona nuèch!
Be sembla que fòrças "manifestants russofòns" sian en realitats agitators e milícias especiaument vienuts de Russia , en autobús, dab las armas dens la mala.
Doás questions se pausan aicí, per que l'informacion siá complèta. Los prorusses d'Uncraïna parlan rus, e pas los autres. Lo mai clar dels prorusses son vesin de la termièra amb Russia.
1) Aqueles russofòns son estajants millenaris de l'endreit qu'i vivon, o de colons russofòns venguts en Ucraïna coma venon de sinofòns al Tibet ?
2) Se los russofòns son estajants d'originas del territòri qu'i vivon, de qué se venon ocupar los vint-e-uèit, davant lo dreit d'un pòble a dispausar d'el-meteis ?
Segon la natura de la responsa a la primièra question, aquela informacion caàmbia ca pe tot de sens…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari