Los Dracs son passats mèstres dins l’art de se complicar la vida e de balhar de tressusors a lors sostens, amb lor capacitat granda de se metre al nivèl (naut o bas) de l’adversari. Demostracion n’es encara estada balhada aqueste dimenge a Bradford; la formacion locala es al pus mal: avantdarrièra, penalizada en punts per sa situacion financièra, cambiament d’entraïnaire... De qué aver lo moral dins las caucetas, levat qu’aquesta formacion faguèt ja plegar los Dracs en Cup e que lo vam de la desesperança pòt joslevar de montanhas. Atal, Bradford marcava lo primièr, mas Morgan Escarré i anava de sa traucada costumièra per egalizar aprèp una corsa de 60 mètres. Los Taures profeitavan d’una operacion  “saldos-pòrtas dobèrtas“, Carrièra de la Lòtja, per marcar dos còps, mas Duport entreteniá las esperanças catalanas per un ensag just abans la pausa que vesiá los Taures menar 18-12. Tre la represa, los catalans pataquejavan la primièra pauma e Luke Gale (autor de 18 punts) tornava marcar. L’ancian societari de Bradford Eliott Whitehead traucava e mandava Ben Pomeroy a l’ensag. Puèi, Eloi Pelissièr embrumava la defensa locala per mandar Julian Bosquet a l’ensag. Amb la transformacion de Sam Williams, las doas formacions n’èran a 24 pertot a l’ora de jòc. Dins una penalitat, lo mesclanha catalan balhava pel primièr còp de la partida l’avantatge als Sang e Aur: 26-24. Jòia de corta durada: Luke Gale tornava marcar en serpentejant dins una defensa catalana petrificada coma los ròcs de Canigó un jorn de granda jalada! A tres minutas de la fin, Sam Williams tustava a seguir e Eliott Whitehead anava pausar la pauma darrèr la rega magica. Sam Williams demorava a 100% de reüssida de sos còps de pè en ensacant la transformacion que balhava la victòria als Dracs: 32-30! La victòria permet als Dracs de confortar la setena plaça amb 3 punts d’avança sus Widnes e 5 sus Hull KR, venceire 40-10 de Saint Helens (que demòra en cap de fila aprèp la desfaita de Leeds a Wakefield 16-14).
 
Dissabte, a 9 oras de la nuèit, Wigan vendrà desfisar los Dracs a Brutus. Probable que los Catalans se saupràn metre un còp de mai, mas en version nauta qualitat, a l’auçada de lor adversari de la serada.
 
Mas l’actualitat catalana es tanben fòra terrenc amb lo renovelament de la fisança per doas annadas a l’entraïnaire Laurenç Fraissinós, a son adjunt Jiròni Guisset e al manager general Sebastian Raguin. Se sap que Leon Pryce prendrà l’an que ven la direccion d’Hull FC e que Miquèl Simon deuriá signar a Wakefield, mentre que Morgan Escarré, Eloi Pelissièr, Ian Henderson e Loís Anderson an tornat signar per la formacion catalana.
 
Los Dracs preparan l’avenir amb los 35 joves, amb plan de joves rosselhoneses, que seràn en estagi aqueste estiu per dintrar dins los 25 que formaràn l’esquipa de Junior-Academy del club.
 
Lo Torn de França de las bicicletas n’a acabat amb son viatge en tèrra tretzista anglesa: Leeds, York, Sheffield o Huddersfield ont viu lo Robinson, primièr venceire anglés d’una estapa del Torn. L’actualitat tretzista de la setmana serà marcada pel tresen Estats d’Origina (aqueste dimècres, a miègjorn, ora occitana; en dirècte sus Be In Sport). Los Blaus de la Nòva Galas an ganhat la tièra de l’an, mas per l’onor los Granats de Queensland ensajaràn d’emportar la partida davant lor public. Probable que lo rescontre serà mai dobèrt que lo segond acte.
 
 
 
 
Alan Roch