Son a percórrer Gasconha en chancas, d’Anglet a Bordèu, per far promocion de la cultura gascona. La còla dels chancaires es aital a far 285 quilomètres per “encoratjar las gents a contunhar de parlar gascon”, segon çò qu’an declarat los chancaires a Sud-Ouest. Los acompanhan dos ciclistas e, pels endreches ont passan, los aculhisson de mond del parçan, mai que mai restacats a la cultura occitana, que lor prepausan de manjar e dormir. Aital, dins las pausas convivialas se parteja, se canta, se dança e se jòga de musica del país. Tanben rescontran d’autres chancaires que fan qualques quilomètres amb eles.
 
Diluns quitèron Anglet (Bas Ador) e arribèron a Sant Martin de Senhans (Maremna). Dimars arribèron fins a Sant Pau d’Acs (Shalòssa) e ièr contunhèron lor viatge, qu’es previst que s’acabe a Bordèu dijòus 28 d’agost. Taversaràn la Lana Gran, lo País de Bug e la Grava en tot passar per Arrion, Morcencs, Sabres, La Bohèira, Sanguinet, La Tèsta de Bug , Biganòs, Marcha Prima, Canejan, Bègla e, a Bordèu, acabaràn lo viatge al bar de Thierry Reunier, Chez le Pépère.
 
Las chancas èran tradicionalament emplegadas dins las Lanas de Gasconha per anar d’un luòc a l’autre e per susvelhar los motons, quand las Lanas èran una granda zòna umida e que lor economia se basava sus l’elevatge ovin. Los pins foguèron plantats al sègle XIX.
 
Podètz seguir l’itinerari, la gèsta e las aventuras dels chancaires sul sit web de la Chancada, sus lor pagina Facebook e sus Twitter.


#chancada Tweets