Bandièra01 1180x150: Comuna de Tolosa

Actualitats

Escòcia a votat non a l’independéncia

Los partits unionistas prometèron a Escòcia mai d’autonomia se ganhava lo “non” e auràn de concretizar aquelas ofèrtas, çò que serà pas gaire aisit

| Vilaweb
Lo “non” a ganhat dins lo referendum per l’independéncia d’Escòcia amb un 55,42% dels vòtes, del temps que lo 44,58% an votat per l’independéncia del país. La participacion es estada un recòrd. E mai se lo resultat independentista es fòrça mai naut que çò que s’esperava fa dos meses, la decepcion es venguda après las bonas expectativas dels sondatges de las darrièras setmanas.
 
Lo resultat de Glasgow es lo mai positiu de la campanha del “yes”, mas a pas servit a compensar los marrits resultats dins d’autres endreches, compreses los luòcs ont tradicionalment ganha lo Partit Nacional Escocés (SNP). Los independentistas an pas tanpauc pogut mobilizar lo vòte laborista del centre del país, qu’èra clau. Los partisans de l’independéncia an ganhat dins d’endreches clarament laboristas coma Glasgow o North Lanarkshire mas, per contra, an perdut a Angus o Perthshire, que son de regions que vòtan per l’SNP e ont s’esperava una majoritat de vòtes independentistas.
 
 
Salmond accèpta lo resultat e demanda als escoceses d’o far
 
Lo primièr ministre escocés es comparegut tre que s’es conegut lo resultat. S’es declarat esmogut per la nauta participacion e a remembrat e remarcat las notablas reaccions de paur e desesperança de l’unionisme e de Westminster a la fin de la campanha electorala, quand apareguèt un sondatge que disiá que l’òc poiriá ganhar. “Los partits unionistas a la fin de la campanha an signat que volián prepausar mai de competéncias a Escòcia, e Escòcia espèra qu’aquò se complisca plan lèu. E an promés la reïnterpretacion de la Lei d’Escòcia lo mes de març que ven. E totes los escoceses voldràn qu’aquel calendièr se complisca”, çò a dich Salmond.
 
 
Un cambiament al Reialme Unit
 
Aquel resultat permetrà a Alex Salmond e a l’SNP de restar al govèrn d’Escòcia. De fach es Londres que deu far quicòm: los partits unionistas prometèron a Escòcia mai d’autonomia se ganhava lo “non” e auràn de concretizar aquelas ofèrtas, çò que serà pas gaire aisit. Segon los analistas politics, lo Reialme Unit farà un grand cambiament e lo nòu modèl institucional qu’aurà Escòcia serà un grand pas endavant. Òm espèra quitament qu’Anglatèrra aja tanben sas institucions, qu’ara a pas de parlament pròpri, e que s’avance cap a un estat multinacional.
 
En tot cas, aquel resultat es una novèla de las bonas per David Cameron. Aquò li permetrà de restar al govèrn del país e d’afrontar las criticas duras que recep darrièrament dins lo Reialme Unit. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limotges
43.

#39 Car Gèli,

ai lo drech de far del'umor, efectivament. Era sus vostre biais de dire, pas sus las analisis de Fontan. Nimai sus vostre comunicat.

Coneisse pas pro Fontan e sos escrichs per poder dire quauquaren dessus.

  • 0
  • 0
Gèli Grande Lairac en Agenés
42.

#40
Car JC Dourdet

Prenem pas los fachs que nos adoban e daissam pas de costat los que nos adoban pas
Constatam que dins las annadas 1970 e 1980 l'empèri sovietic e la iogoslavia de l'epòca èran considerats coma d'orizonts indespassables ... la tectonica dels pòbles n'a decidit d'un autre biais.
e d'exemples d'aquela mena l'istòria n'es clafida ... a la debuta del sègle 20 qual auria escomes (parié) que los franceses se farian fotre defòra d'Argeria ? etc .....

Quitament se per un fum d'occitanistas legeires o pas de Jornalet França exagonala pareis uèi un orizont indespassable ... d'un biais o d'un autre l'avenidor occitan es pas escrit .... se pòt melhorar tant coma pòt empejorar .....

  • 3
  • 0
Reinat Niça
41.

#34 Li a pas soletament que li rotas comerciali que son ligadi au relarg parisenc, li a tanben lo malhum ferroviari, volètz quaucu ex. aquí n'avètz : NIça -Bordèu, praticament pus de ligams dirècts, cambiament a Marselha ; Niça-Estrasborg : un tren cada jorn embe cambiament a Lion Part-Dieu, ò alora un tren de nuèch e pas mai ; Niça-TGV Haute Picardie : lo TGV que religava directament a Lilla e Brussèla es suprimit despí l'an passat, aüra nos cau (tornar mai), cambiar a Marselha..... embe 45 m d'aspèra ; es pas bèu aquò ! Niça es lo traufinhòu de l'Exagòne, per la cinquena vila d'aqueu fotut país li a pas de que si regaudir, que ? E la SNCF que nos vòu faire aimar lo tren ?

  • 5
  • 0
JC Dourdet
40.

#39 Se prenen suvent los "fachs" que nos 'doban lo mai en botar de costat los fachs que nos 'doban pas ;-) L'i a pas una veritat e una sola, subretot en sciéncias umanas.

  • 5
  • 3
Gèli Grande Lairac en Agenés
39.

#27
Car Maime Caillon

Te rasseguri per l'aver conegut Fontan se prenia pas per Nostradamus.
Fontan tirava las conclusions logicas de sa pensada emancipatritz per totes los pòbles de la tèrra
Dins las annadas 1970 1980 quand lo PNO disia qu'un jorn l'empèri sovietic espetaria e qu'Alemanha se reunificaria totes los marxistas de l'estat francés s'estrassavan del rire ... quand se passèt la casuda de la paret de Berlin en 1989 e dos ans apuèi la fin de la "Santissima"URSS lo rire cambièt de camp.
E los meteisses que i cresian pas nos demandèron quins seràn los seguènts sus la lista .... e lor forniguèrem una tièra longa de nacions en Euròpa occidentala e dins lo monde .....

As lo dreit de pas èsser d'acòrdi e de far d'umor .... mas los fachs son capborruts

  • 4
  • 1

Escriu un comentari sus aqueste article