Bandièra01 1180x150: País Invisible

Actualitats

L’exili de Kobanê, dins un reportatge vidèo en catalan

Vilaweb ofrís un documentari d’Alan Kanjo, un catalan d’origina curda

Alan Kanjo nasquèt e demòra en Catalonha. Lo sieu paire es curd, proven de Kobanê, al Curdistan de l’estat sirian, just al limit amb l’estat turc, assetjat dempuèi setembre per las fòrças de l’Estat Islamic. Kanjo decidiguèt d’anar a la frontièra amb Turquia per ajudar los curds e rescontrar qualques parents. Las siás experiéncias la explicava en dirècte sus son blòg, e ara n’a publicat un documentari vidèo que podètz veire en seguida.
 
Lo vidèo s’enregistrèt a fin de setembre e relata lo viatge cap al vilatge del sieu paire, Susan, dins una frontièra assetjada per l’Estat Islamic. I parlan de testimònis que lor a calgut quitar lors ostals, qu’explican las oras de fusilhadas e de bombardaments quand ensajan de traversar la frontièra en fugissent lo fuòc. “Aiçò es vengut una guèrra, nos cal resistir e contunhar de far abans”, çò ditz a la camèra una gojata refugiada.
 
Dins lo documentari se pòt veire tombar las bombas de l’Estat Islamic a qualques mètres del luòc ont es l’Alan Kanjo acompanhat d’Albert Elfa, lo jornalista enviat per TV3, la television publica de Catalonha. Conta l’arribada a la frontièra amb Turquia e mòstra las filas quilometricas per la traversar, totas plenas de curds que vòlon intrar a Kobanê armats amb de pèiras.
 
Los crits de “Visca la resisténcia” se combinan amb lo drama de l’exili, lo desespèr per trobar los parents e la fatiga dels pichons.
 
“L’imatge me remembra l’exòde de 1991, quand de milièrs de curds fugiguèron Saddam Husayn, mas aqueste còp ven a nòstre pòble”, çò ditz la votz en off de l’Alan. E clava lo documentari amb un epilòg que daissa pas indiferent: un recuèlh d’imatges de Kobanê enregistrats en 2006: “Quand tombarà, se tomba, remembratz cossí èra Kobanê”. 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article