Diluns de matin se faguèt publica la lista dels noms dels titulars de comptes dins la filiala soïssa de la banca britanica HSBC. Son de milièrs de noms, dont mantas personalitats restacadas al mond de l’espòrt, de l’espectacle e de la banca. I a, per exemple, los pilòts Fernando Alonso, Valentino Rossi e Michael Schumacher, los cantaires David Bowie e Tina Turner, la manequin Elle MacPherson, los reis Muhammad VI de Marròc e Abdallah IId de Jordania o l’èx-president de la Banca de Santander, lo defuntat Emilio Botin.
 
Son las donadas de la dicha lista Falciani, que l’a elaborada un grop d’investigacion ont an participat The Guardian, Le Monde e El Confidencial entretant.
 
Dins aquela lista se publica de milièrs de noms e de comptes de residents dins de païses de tot lo Mond qu’avián anonimament, segon de donadas de 2006 e 2007, mai de 100 miliards de dolars dins la banca soïssa.
 
 
Tot comencèt a Niça de la man d’un monegasc
 
Aquelas informacions son provesidas per l’informatician monegasc Hervé Falciani, que dempuèi 2009 collabòra amb la justícia de qualques païses. Trabalhèt al sèti central de la banca HSBC en reorganizant la basa de donadas per ne refortir la seguretat. Aquí descobriguèt aut o bas 130 000 comptes escurs qu’amagan una enòrma fraudariá fiscala gaireben dins totes los païses del Mond, dont França, Espanha e Itàlia. Entre 2006 e 2008, cada jorn, Falciani fasiá de còpias en secret d’aqueles movements bancaris en descargant una enòrma basa de donadas dins son ordenador portable. Una informacion que lo podiá far venir un eròi social o lo rei del cantatge.
 
En decembre de 2008, lo detenguèron las autoritats soïssas. En èsser liberat, se n’anèt a Niça ont lo procuraire, Éric de Montgolfier, remarquèt la portada de las donadas que Falciani aviá amassat, e aital comencèt l’enquèsta mondiala contra los fraudaires. L’enquèsta a fach recuperar al fisc francés 186 milions d’èuros.