Bandièra01 1180x150: Comuna de Tolosa

Actualitats

Seguissètz lo torn del Mond de l’avion solar supervisat dempuèi Mónegue

S’envolèt ièr lo Solar Impulse 2, lo primièr aparelh que percorrerà 35 000 quilomètres sens combustibles fossils

Ièr de matin, après lo “go” oficial dich pel prince Albèrt de Mónegue, s’envolèt de l’aeropòrt d’Abu Dhabi (Emirats Arabis Units) lo Solar Impulse 2, un avion abitat que cèrca de far lo torn del Mond en estapas pendent los cinc meses venents, solament alimentat per d’energia solara. La primièra estapa de 400 quilomètres los a menat fins a Mascat, la capitala d’Oman, e uèi son a volar fins a Ahmadabad, a l’oèst d’Índia.
 
 
L’aparelh, pilotat per André Borschberg e Bertrand Piccard, es impulsat per dètz e sèt mila cellulas solaras dispausadas long dels setanta dos mètres d’alas.
 
Totas las informacions de la gabina e las comunicacions entre los pilòts amb lo centre de contraròtle internacional, plaçat a Mónegue, se pòdon seguir en detalh sus aqueste sit web.
 
Amb lo Solar Impulse 2, los dos pilòts vòlon percórrer fins al mes d’agost 35 000 quilomètres, amb una altitud maximala de 8500 mètres e una velocitat de 140 quilomètres per ora. Al total seràn aperaquí vint e cinc jorns de vòl real.
 
Après dotze ans d’investigacion, lo Solar Impulse 2 s’envolèt ièr amb la tòca principala de promòure las energias e las tecnologias netas e, de rebucada, de luchar contra lo rescalfament mondial e lo cambiament climatic.

 


 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Òsca pel felen de Virasolelh! (Lo professor Auguste Piccard, inventor del batiscaf, serviguèt de modèl a Hergé.) Quand òm vei l'evolucion de l'aviacion pendent un sègle, segur que los trastes de querosèn de uèi faràn riure en 2100! Los politics bòrnis que nos govèrnan veson pas mai luènh que lo petròli. Los que son consciènts, ailàs! son pas en capacitat de mandar.

  • 7
  • 0

Escriu un comentari sus aqueste article