Aqueste diluns en serada, los Dracs Catalans anavan desfisar los Lops de Warrington. En jòc: la segonda plaça al classament, plaça importanta en vista de las pelhòfas.

 

Ploviá sus Warrington e la temperatura èra fresca. Los sang e aur passavan la primièra mièja-ora a defendre, e ba fasián plan: encaissavan un sol ensag a la 16a minuta per l’avant Westwood que recuperava la pauma aprèp una carga d’un equipièr. 6-0 pels Angleses a la pausa.

 

Los Dracs tornavan amb de melhoras intencions, mas concretizavan pas lors atacas. Al contrari, Warrington jogava a la man aprèp un cinquen tengut e lo centre Atkins se recuperava son còp de pè al ras de la pelena: 10-0.

 

Los Dracs acabavan per marcar: Menzies servissiá Baiteri lançat a fons e que puntava al pè de las barras. Dureau transformava. Demorava 20 minutas de jòc, mas Warrington se mostrava mai realista e ensacava doas penalitats e un tombat per l’emportar 15-6.

 

Warrington jogarà aquesta dimenjada una mièja-finala de la Cup contra Huddersfield. L’autra aficha es una confrontacion entre Leeds e Wigan.

 

Los Dracs profitaràn del dissabte 14 de julh per metre a jorn lor calendièr amb la recepcion de vèspre, sul còp de 18h, de Hull FC a Brutú. La partida foguèt remesa en febrièr en causa de la jalada.

 

Cal saludar l’equipa de Bradford qu’es a las escanas financièrament. Se parla d’un despaus de bilanç, mas sul tarrenc los jogaires, benlèu amb l’energia del desespèr, son anats ganhar cò del cap de fila Wigan la setmana passada e an batut bravament aquesta setmana Londres 44-12.

 

L’actualitat tretzista èra tanben internacionala lo dimècres 4 de julh amb lo revenge entre Anglatèrra e Exiles dimècres a Huddersfield. Venceira de la primièra partida, Anglatèrra fasiá virar sos efectius per passar en revista los jogaires susceptibles de representar lo país per la Copa del monde de 2013. Dins dos temps simetrics: 16-10 cada còp pels jogaires dels Antipòdis, son los Exiles que se son impausats: 32-20.

 

Dins aquesta formacion, los 3 Dracs Dureau, Millard e Menzies an jogat coma cal. En Australia, se disputava la tresena partida del State of Origine, partida decisiva vist que lo Queensland aviá ganhat la primièra: 18-10 e que l Nòva Galas del Sud aviá pres son revenge 16-12 dins un estadi de Sidney comol amb mai de 80 000 espectators. A Brisbana, la partida tenguèt totas sas promessas amb los Blaus de la Nòva Galas que se vesián plan arrestar una tièra de sièis annadas al benefici dels Marrons. Un ritme d’infèrn per una victòria que metèt temps per causir son camp. Calguèt esperar un tombat del mesclanha Cronk per faire la diferéncia a tres minutas de la fin: 21-20 en favor de la còlha del Queensland.

 

En Catalonha, lo Drac Stacul ven de faire part de sa signatura per Pià per la sason venenta.




Alan Roch