Bandièra01 1180x150: Comuna de Tolosa

Actualitats

La vila d’Agen fa un omenatge a Jansemin en pausant una placa en occitan al pè de son estatua

Amb la preséncia del cònsol de Malhana, la vila natala de Mistral

| Agen47
Dimars passat fasiá 145 ans de l’inauguracion de l’estatua de Jansemin a Agen. En aquela ocasion, la muncipalitat faguèt un omenatge al poèta d’expression occitana, en preséncia de Jaume Mouttet [Jaque Mouttet], capolièr del Felibritge, de Joël Suppo, cònsol de Malhana (vila natala de Frederic Mistral), de François Pontalier de l’Escòla de Jansemin, de Jacques Clouché, especialista de Jansemin, e fòrça autres convidats.
 
Lo cònsol d’Agen, Jean Dionis du Séjour; l’adjonch delegat a la cultura e al torisme,  Laurence Maïroff, e Jeanine Cazes-Grande, presidenta de l’associacion Agenés Tèrra Occitana, inaugurèron una placa en occitan e francés al pè del monument, mentre que cantava la corala Andante amb lo tenor Christian Moulié. Puèi l’encargat de la comuna a la lenga e la cultura occitanas, Joan-Pèire Alari, declamèt l’òda que Frederic Mistral escriguèt en omenatge a Jansemin.
 
Jansemin èra l’escais de Jaume Boèr, un perruquièr agenés que se faguèt popular en cantant sos poèmas a la clientèla. Sa popularitat venguèt tan granda que percorreguèt Occitània en recitant sos poèmas, e se consagrèt definitivament coma poèta nacional occitan en recitant L’Avugla de Castèlculièr a Bordèu en 1836. Tre aquel moment sos recitals èran multitudinaris e ne faguèt aperaquí 12 000. Jansemin donava l’argent que ganhava de sos espectacles a d’òbras de caritat.
 
Foguèt lausat per d’escrivans coma Honoré de Balzac, Charles Nodier e Alphonse de Lamartine, que lo nomenèt “l’Omèr dels Proletaris”; e tanben pel compositor Franz Liszt, ja que se coneguèron a Agen en 1844. Napoleon III li donèt la Legion d’Onor, l’Acadèmia Francesa li concediguèt una pension e lo papa Piu IX lo consagrèt coma cavalièr de Sant Jòrdi. Mas çò mai remarcable es que Mistral li rendèt omenatge, e mai se Jansemin s’èra pas jamai interessat al Felibritge.
 
Jansemin èra un grand orator que reviscolèt la poesia populara occitana e sas creacions influiguèron gaireben sus totes los poètas seguents.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felibre
4.

#2 A pas de sèns d'escriéure "óucitan e felibre", car, pèr definicioun, un felibre es toujour un óucitan.

  • 12
  • 0
Felibre
3.

#2 Que??? Li felibre soun óucitan!

  • 9
  • 0
Joan Puech Espaliu
2.

Quand occitans e felibres s'endevenon, pòdon far un brave trabalh !

  • 7
  • 3
Òlo Pujòlo
1.

Coma en Montpelhièr. Tot parièr

  • 5
  • 0

Escriu un comentari sus aqueste article