Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaMónegue

Brussèlas inclutz Mónegue e Andòrra dins la lista negra dels trenta païses mens cooperadors en matèria fiscala

Lo comissari Pierre Moscovici ditz que l’UE ten una “posicion robusta contra los paradises fiscals”

| Hampus Cullin
Dimècres, la Comission Europèa a situat Mónegue e Andòrra dins sa lista dels 30 païses del Mond entièr que son los “mens cooperadors” en matèria fiscala, valent a dire, que son de “paradises fiscals”. La lista, que cobrís los cinc continents, inclutz de païses que son “almens dins la lista negra segon 10 estats membres de l’UE”, coma o a explicat l’eurocomissari dels afars economics, lo francés Pierre Moscovici. En mai de Mónegue e Andòrra, la lista tanben inclutz, d’Euròpa, Liechtenstein e Guernesey. Lo continent amb mai de paradises fiscals es America, amb d’estats coma Antigüa, las Bahamas, Belize, las Illas Caiman o Barbados. Hong Kong o las Maldivas, d’Asia, tanben se tròban dins la lista negra de l’UE, coma Libèria, d’Africa.

“Nòstra esperança es que totas aquelas jurisdiccions adòpten aviat los estandards internacionals per luchar contra l’evasion fiscala”, çò a assegurat Pierre Moscovici en una conferéncia de premsa dempuèi Brussèlas. Segon l’eurocomissari, certans estats ja son a o far o tenon l’intencion d’o far, e l’UE fa un “pas decisiu” dins la lucha contra l’evasion en publicar la lista dels estats que mens coopèran amb Brussèlas en matèria fiscala.

L’estat de Mónegue (en Occitània) amb l’estat d’Andòrra (dins los Païses Catalans) son considerats coma de paradises fiscals segon Brussèlas e, en particular, segon los membres seguents de l’UE: Belgica, Bulgaria, Croàcia, Espanha, Estònia, Grècia, Itàlia, Letònia, Lituània, Polonha e Portugal.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article