Bandièra01 1180x150: Comuna de Tolosa

Actualitats

Lo cementèri francés dels migrants en Africa

L’Ocean Indian, a l’entorn de l’illa de Maiòta, es lo ponch negre ont mai de migrants morisson en cercant una vida melhora

| Lebelot
En Euròpa sèm esglasiats per las tragèdias que se passan ben sovent en la Mediterranèa, ont de centenats de refugiats morisson negats en ensajant de fugir la guèrra, la repression o la misèria. Mas dins l’Ocean Indian se passan mai de tragèdias d’aquela mena. Es una crisi umanitària que dura dempuèi longtemps mas que se’n parla pas tant dins los mèdias. L’illa de Maiòta, de sobeiranetat francesa, atrai de mai en mai de personas que fugisson las autras illas vesinas de l’archipèla de las Comòras. De milièrs de personas son mòrtas en ensajar d’arribar a Maiòta dempuèi lo moment que los abitants d’aquela illa votèron per far partida de França, mentre que las autras illas de las Comòras votavan per lor independéncia.
 
Segon çò qu’explica la BBC, la situacion ailà es una còpia exacta de çò que se passa en la Mediterranèa, ont lo mond ensajan de passar en Euròpa dempuèi lo Nòrd d’Africa e Turquia, en cèrca d’una vida melhora.
 
Generalament los mèdias fan s’avisan pas d’aquela crisi que se passa dins las aigas de l’Ocean Indian, entre Moçambic e Madagascar. “Avèm la trista reputacion d’aver lo mai grand cementèri marin”, çò declarèt en mai passat lo governador de Nzwani (Anjouan), Anissi Chamsidine.  Mai de 50 000 comorians son mòrts dins lo silenci de la comunautat internacionala e davant l’indiferéncia de l’estat francés.
 
La BBC ven de publicar un reportatge amb de testimoniatges dels ans 90 fins a l’actualitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article