Bandièra01 1180x150: Comuna de Tolosa

Actualitats

D’indigènas mexicans denóncian una dessenhaira de mòda francesa per plagi

Isabel Marant presentèt una blòda que còpia la blòda tradicionala del pòble mixe

Creacion d’Isabel Marant
Creacion d’Isabel Marant | Peña Miente
Las autoritats municipalas de Santa María Tlahuitoltepec (dins l’estat d’Oaxaca, en Mexic) an denonciat la dessenhaira de mòda francesa Isabel Marant per aver plagiat d’elements grafics tradicionals del pòble mixe dins un modèl de blòda que l’expausèt ela dins sa colleccion “Étoile” per la prima-estiu de 2015. Vòlon entreprene d’accions legalas per denonciar l’“apropriacion d’un patrimòni cultural ancestral”, segon çò que rapòrta lo jornal mexican Proceso.
 
Lo cònsol, Erasmo Hernández, expliquèt als mèdias qu’“Isabel Marant es una marca e lo nom d’una dessenhaira francesa que sa linha, Étoile prima-estiu 2015, inclutz una colleccion qu’a de patrons grafics preses indiscutiblament de la blòda de Tlahuitoltepec sens donar los crèdits correspondents, en privatizant aital una proprietat collectiva”. E mai, soslinhèt que l’acte de la dessenhaira “viòla la Carta Magna e los instruments internacionals sus la pluriculturalitat e los dreches dels pòbles indigènas”.
 
Lo “huipil”, o blòda de Tlahuitoltepec, que la dessenhaira francesa auriá copiat, compren de figuras “que fan referéncia a l’equilibri de la lenga ayuujk” e mòstra “un biais de se restacar al Mond”, e de “ne preservar l’identitat”. Per los denonciaires, la blòda de Tlahuitoltepec “es una entitat viva pr’amor qu’es pas lo passat, pr’amor qu’es pas un musèu, pr’amor qu’es pas de folclòre, e qu’al contrari pòrta una cultura que fa referéncia a la biodiversitat de la region mixe”.
 
Los mixes demandan a las autoritats mexicanas e a la dessenhaira francesa de reconéisser los elements grafics de la camisa copiada e an exigit que s’arrèste la produccion del modèl de Marant, que se repare los damatges ocasionats e que se reconesca lo dessenh d’origina.
 
 

 
 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emmanuèl Isopet
2.

Ai benlèu pas tot comprés, mas vesi pas en qué copiar o s'inspirar de quicòm es tant grèu? Al limit imagini plan que los mixes profièchen d'aqueste afar per forçar l'artista a marcar l'origina de son inspiracion; aquò lor fariá mai de publicitat que demandar la fin de la produccion.

  • 0
  • 2
Pirolet
1.

Los laboratòris farmaceutics lor an panat los medicaments e ara la mòda lor pana lors vestits.
Emai la lambada foguèt un afar d'aquestes. Se volètz ausir la cançon originala, vos cal picar
"Llorando se fue".

  • 2
  • 0

Escriu un comentari sus aqueste article