Bandièra01 1180x150: Comuna de Tolosa

Actualitats

Rugbi de XIII: pas pro infernals, los Diables!

Imatge: Lo public, dreit, saludèt longament la rintrada sus la pelena de Tomàs Bòsc per sa 200a partida de Superliga amb los Dragons
Imatge: Lo public, dreit, saludèt longament la rintrada sus la pelena de Tomàs Bòsc per sa 200a partida de Superliga amb los Dragons
Dins mai d’una partida de la dimenjada, calguèt esperar los darrièrs moments per saupre cossí virariá l’afar. Pròva de mai que l’espòrt es pas una sciéncia justa mas un movement perpetual e de mal contrarotlar.
 
 
E de sèt, dins la dolor, pels Dragons
 
Tomàs Bòsc dintrèt solet sus la pelena e foguèt saludat per 10 000 espectatrors dreits: anava jogar sa 200a partida de Superliga amb “els Dragons”.
 
Mas los Diables de Salford li daissèron gaire lo temps d’apreciar lo moment. Del banc (ont comencèt la partida), vegèt los Roges marcar tre la 5a minuta a la recuperacion d’un còp de pè a seguir. Aürosament, Inu, que se nafrèt al genolh sus la segonda traucada, metiá sus orbita Broughton puèi Escarré. Los Diables avián causit d’escartar al pus mai la palma. E se Duport marcava a la 35a minuta, los angleses èran encara al contcate a la pausa: 16-14 pels catalans.
 
Los angleses prenián l’avantage a la 49a minuta, mas los catalans encadenavan tres ensages: Myler (51a), Broughton (55a) e Myler tornar (58a). Richards ne transformava dos e ajustava una penalitat: 34-20 pels Sang e Aur. Los Diables tornèron sortir de la boita per passar un còp sus l’ala dreita, l’autre sus l’ala esquèrra. Demoravan 12 minutas de jòc e l’avança catalana aviá fondut coma la nèu sul Canigó: 34-32. Mas, aprèp una carga elefantesca de Mason, Richards se jogava de la defensa diabolica e Tomàs Bòsc passava la transformacion qu’assegurava la victòria catalana, refortida per una darrièra penalitat de Richards: 42-32. Qu’aquela victòria (setena de la tièra) es estada complicada d’obténer! E tre divendres, “els Dragons” seràn cò d’Hull FC que lor i faguèt plan de misèrias a Brutus per la partida anar. Aqueste dimenge, Hull FC ganhèt a Wakefield: 46-28.
 
En cap de classament, los Dragons son encara a egalitat de punts amb Warrington (venceire 48-16 a Widnes, que marca lo pas) e de Wigan que se deguèt emplegar per batre Huddersfield: 26-19. Las doas formacions se rescontraràn dijòus a Warrington. Leeds contunha de manjar son pan negre: desfaita d’un res 38-34 a St Helens. Hull KR sortís de l’espirala de la desfaita del costat de Castleford e fa pas las causas a mièjas: 58-16.
 
 
En rota pels quarts!
 
N’èrem als barratges del campionat d’Elèit marcats per las victòrias de las formacions catalanas: Sant Estève-XIII Catalan bat Vilanuèva 44-16 e Palau arrèsta la sason d’Albi: 30-10.
 
Los quarts de dimenge veiràn doncas las partidas Lesinhan-Palau e Avinhon-Dragonets.
 
 
La Cup que ven
 
En oiten de Cup, lo 6 de mai, los catalans anaràn cò de Batley (formacion del Championship) mentre que, lo dimenge 8 de mai, Tolosa se mesurarà en Anglatèrra a una formacion de Superliga: los Gats Fèrs de Wakefield.
 
Aqueste dimenge, en Championship, Tolosa a obtengut l’egalitat a Rochdale 28-28. Dissabte, recebràn Oxford a Blanhac (6 e mièja del vèspre).
 
 
Impressions anglesas
 
Aquí la cronica occitana pareguda dins lo numèro de mai de XIII Magazine:
 
“En febrièr, anèri en Anglatèrra seguir los 3 rescontres entre formacions anglesas e australianas. Vaquí a la lèsta unas impressions del viatge:
 
— Estadis: fa de ben de se trapar dins un estadi al mitan de 20 000 espectators que son aquí per seguir de partidas de XIII.
 
— En familha: las familhas venon, dels pichons al papeta e la mameta, vestits dels pès al cap a las colors del club local. Se vei de dònas plan mesas arborar fièrament las petetas de las mascòtas!
 
— En cançon e musica: e tot aquel mond reprenon en còr l’imne de la formacion per saludar las reüssidas o per tornar balhar vam dins los moments malaisits.
 
— Sus l’ecran: abans la partida e a la pausa, desfilan de messatges de bon anniversari. Una marca esponsoriza las expulsions de dètz minutas!
 
— Cervesa: es fòl tot çò que se pòt engolir coma cervesa. Los clavaires del país serián plan contents s’al bar se beviá lo quart de la mitat d’aquò: aurián pas mai de problèmas d’equilibri financièr al moment dels comptes annuals.
 
— Caireforc: a unes caireforcs del costat de Manchester, pensas que vas virar canturla: totas las pancartas pòrtan de noms de ciutats del XIII!”
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
2.

Krisnan Inu : sason acabada (nafrat als ligaments crosats del ginolh).

  • 2
  • 0
L'Alan Carcassona
1.

De fait, los quarts d'Elèit-1 se jogaràn dissabte de vèspre a Avinhon (retrasmés en estriming per la FFR13) e Lesinhan.

  • 2
  • 0

Escriu un comentari sus aqueste article