Lo president francés, François Hollande, diguèt dimars passat que França refusa la signatura del Partenariat Transatlantic de Comèrci e d'Investiment (lo TTIP, segon sa sigla en anglés, qu'es tanben conegut coma TAFTA), a l'estadi actual de las convèrsas, perquè “[sòn] pas per lo liure escambi sens règlas”.
 
“França ditz de non a l’estapa que coneissèm de las negociacions comercialas internacionalas”, çò diguèt Hollande dins un discors que faguèt a l'ocasion del collòqui “L’esquèrra e lo poder”, a París. “Jamai acceptarem pas la mesa en causa dels principis essencials per la nòstra agricultura, la nòstra cultura, per la reciprocitat per l’accès als mercats publics”, çò diguèt lo president francés, coma o podèm legir dins Le Monde.
 
França aviá pausat “de principis dins lo quadre de las negociacions comercialas internacionalas. Pensi a las nòrmas sanitàrias, alimentàrias, socialas, culturalas, environamentalas”, çò apondèt.
 
Prèviament, lo secretari d’estat encargat del Comèrci Exterior, Matthias Fekl, aviá soslinhat que l’opcion mai probabla èra que se suspendèsson las negociacions, vista la posicion dels Estats Units.




Discours lors du colloque « La Gauche et le...por elysee