Bandièra01 1180x150: Comuna de Tolosa

Actualitats

L’èx-cap de la fòrça aeriana turca, cobèrt de marcas de tortura, confèssa ara qu’el a organizat lo còp

La repression d’Erdoğan es de mai en mai brutala, amb de milièrs de detenguts e de foncionaris licenciats

| Anadolu
L’èx-cap de la fòrça aeriana de Turquia, Akın Öztürk, a confessat qu’el “agiguèt amb l'intencion d’organizar un còp d’estat”, segon çò qu’a raportat l’agéncia oficiala d’informacions Anadolu. L’agéncia a difondut d'imatges d’Öztürk, cobèrt d'indicis de tortura, a la sortida d’un interrogatòri e susvelhat per divèrses agents.
 
Las fotografias qu'an difondudas las agéncias de notícias turcas permeton de veire las nafras patidas per Öztürk pendent l’interrogatòri, visibles al cap e a la part superiora del còrs, amb de blaus a la cara, als braces, al pitre e una aurelha bendada.
 
Vaicí una fotografia vielha d’Akın Öztürk amb lo president Erdoğan, e una de ièr al costat, per poder far la comparason.
 

 
Öztürk foguèt detengut dissabte passat, acusat d'èsser lo responsable de l'organizacion del còp d’estat. Inicialament, aviá negat tota implicacion e quitament aviá declarat qu’el aviá ensajat d’arrestar lo soslevament. Lo president, Recep Tayyip Erdoğan, a soslinhat que l’influent clèrgue Fethullah Gülen, exiliat als Estats Units, es un dels cervèls del putsch.
 
La repression iniciada per Erdoğan, tanlèu malescasut lo còp d’estat, a implicat la detencion de milièrs de militars, la suspension de milièrs de jutges e tanben de milièrs d’agents de la polícia. Demest los militars detenguts i a 103 generals e amirals de las fòrças armadas, un tèrç del total. Demest los 8000 detenguts i a mai de 6000 soldats, 755 jutges e procuraires, 650 foncionaris civils e mai d’un centenat de policièrs.
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
5.

L'aviacion sol ser lo cos mai progressista dels exèrcits. Aquesta colha d'integristes pagaran lo que estan fent.

  • 2
  • 0
Antisistèmi
4.

#3 Far dintrar Turquia dins Euròpa o pas ? La question non nos aperten pas. Non la nos pausaràn pas. Basta que semble raportat mai moneda a un ponherat d'entrepreneires internacionals e a qualques financiaristas desmezuradament poderoses, e veiràs que dintraràn, que nos agrade o non… E dels dreits de l'òme, aquela raça maldita de decidèires internacionals se'n tondon cap e tot dempèi l'origina dels tempses capitalistas.

  • 6
  • 0
Ankarà
3.

Quina vergonha ! Mai d'aquò saupon que lo monde leis agachan, aprés aquò vòlon dintrar en Euròpa ?

  • 4
  • 0
comtessa de Dia
2.

la turquia s'encamina vers una dictatura islamista amb la chariah per modèla, la tortura e la purga deis elements laïcs e dei partisans de l'autre mamamouchi eisilat aies Estats-Units e pîcaràn mai a la pòrte de l'Euròpa, aqueles chiapacans !

  • 6
  • 0
Pirolet
1.

Val mai una pastilha de Dafalgan puslèu qu'una d'Erdogan per te far passar lo mal de cap. Lo país-dels-dreches-de-l’òme s’es afanat per condemnar lo còp d’estat. Los alemands tanben mas al mens an rapelat que l’estat de drech en Turquía es tot tòrt.

  • 9
  • 2

Escriu un comentari sus aqueste article