Banksy es un artista de carrièra engatjat e fòrça conegut, mas se desconeis qual es. Sembla mai o mens clar qu’es anglés e qu’es nascut a Bristol, mas i a mila milanta teorias a l’entorn de son identitat. Quitament l'Universitat Queen Mary de Londres faguèt una enquèsta scientifica per o descobrir, en analizant 140 endreches ont l’artista aviá daissat son òbra, e se faguèt puèi una mapa dels luòcs percorreguts per Banksy. Amb totas aquelas donadas l’estudi arribèt a la conclusion que Banksy es un òme anglés de 42 ans apelat Robin Gunningham. Un suspècte ordinari. Lo jornal Daily Mail l’aviá ja mençonat en 2008. Ça que la, aquela teoria trantalha perque degun a pas jamai vist Gunningham pintar.
 
Lo jornalista d’investigacion Craig Williams, après i chifrar, se metèt al trabalh per ne determinar l’identitat. Segon Williams, Banksy es Robert del Naja, un dels membres de la banda Massive Attack. De mai, Williams ditz que tota la banda i poiriá èsser implicada.
 
La conclusion se basa sul fach qu’an aparegut de grafitis de l’artista en mai d’un desenat de vilas quand lo grop i jogava. Per exemple Melbourne (2003), Nòva Orleans (2008), San Francisco (2010), Toronto (2010) e Boston (2010). Dins totas aquelas vilas apareguèron de grafitis de Banksy qualques jorns après los concèrts de Massive Attack.
 
Robert del Naja es musician, mas a tanben trabalhat d’autras disciplinas artisticas e dins las annadas 1980 pintava ja de grafitis. En mai d’aquò el a assegurat qualques còps qu’es amic personal de Banksy, pr’amor que la banda se fondèt dins lo mitan underground de Bristol. Del Naja apareis tanben dins lo documentari Exit Through the Gift Shop, (traduch en francés coma Faites le mur !) realizat per Banksy.