Las fins de sason se sarran en Euròpa e en Austràlia. Novèla partida aqueste còp definitivament decisiva pels Dragons, una finala per Tolosa, la finala de NRL e las mièjas finalas de Superliga: aquí un programa de tria per aquesta dimenjada.
 
 
Dragons: mas cossí arrestar la davalada?
 
Aqueste dissabte, a Brutus, la mission dels Dragons èra d’una simplicitat bèla: ganhar per demorar en Superliga. A la pausa, Dragons e Vikings de Widnes avián passat doas penalitats de cada costat 4-4, mas los catalans avián pas mes a profièit dètz minutas en superioritat numerica. Los Sang e Aur reprenguèron lor jòc estequit sens imaginacion e sens sosten, amb un jòc de pè defalhent. En fàcia, Widnes jogava tanben simple: 5 tenguts e una granda candela, mas amb mai de vam. Talament que los angleses marquèron dos ensages, lo primièr sus l’ala esquèrra e lo segond sus l’ala dreita: 12-4. Los Dragons se lancèron dins lor operacion remontada e envièron – enfin - de jòc: Bosquet marquèt entre los pals e Walsh transformèt. Los Dragons tornavan a 10-12. Mas las fautas de man e la defensa anglesa empachèron los catalans de tornar marcar.
 
Tant qu’a i èsser, ensagèron pas d’ensacar la penalitat que lor auriá permés de reçaupre Leigh la setmana venenta. Serà doncas cò dels Centurions dissabte de vèspre qu’aniràn jogar la partida “a la vida, a la mòrt”: lo venceire jogarà en Superliga en 2018, lo perdent en Championship. Una setmana per se remotivar e trapar un pauc de vam, se que non serà una catastròfa non solament pels Dragons mas tanben pel XIII d’Occitània e de Catalonha.
 
 
La Superliga aurà un campion novèl
 
Èra la darnièra jornada de la fasa regulara de Superliga. Dijòus, St Helens assegurèt sa plaça en mièja finala amb una victòria a Salford:  30-4. Divendres, Hull FC anèt batre Castleford, qu’aviá daissat de jogaires clau al repaus en vista de la mièja finala: 48-16 e confirmava atal sa qualificacion. Dissabte, lo campion 2016 Wigan aviá pas res mai a jogar a Wakefield: la qualificacion per las mièjas finalas s’èra ja enaurada (desfaita de Wigan: 32-0).
 
En mièja finala, lo cap de fila Castleford reçauprà Sant Helens dijòus e Leeds reçauprà Hull FC divendres. L’avantatge del terren serà sufisent per Castleford e Leeds? Qui sap…
 
 
Tolosa en finala
 
En dominant Dewsbury 36-22, lo Tolosa Olimpic jogarà la finala de son Bloquièr de Championship aqueste dissabte de vèspre a Blanhac amb la recepcion de las Aglas de Sheffield qu’an ganhat 28-26 a Batley.
 
 
NRL: Los Vaquièrs se convidan a la finala.
 
Divendres, en mièja finala d’NRL, la Tempèsta de Melbourne recebiá los Bròncos de Brisbane. Lo primièr temps foguèt equilibrat, puèi Melbourne s’enaurèt: 30-0.
 
Los Vaquièrs son los convidats miraculats de las fasas finalas. Calguèt una improbabla desfaita dels Dragons de Sant Jòrdi dins las darrièras dètz minutas de la darnièra partida de classament per los mandar en pelhòfas. Per las mièjas finalas, los jogaires de Townsville, anavan desfisar los Polets de Sydney. A la pausa, los Vaquièrs menavan 8-6. A la represa, los Polets dintrèron amb mai de vam e marquèron dos ensages per menar 16-8. Los Vaquièrs tornèron metre la man sus la partida per menar 22-16, passar un tombat (23-16) e acabar de faire virar los Polets a l’ast sus la darrièra accion (29-16).
 
La finala de dimenge 1r d’octòbre opausarà doncas la Tempèsta de Melbourne que senhoreja sus la sason e los Vaquièrs que son sus una dinamica de victòrias. Aquò promet!
 
 
 
 
Alan Roch