Lo president dels Estats Units, Donald Trump, a acceptat l’invitacion del president nòrd-corean, Gim Jeongeun (Kim Jong Un), e los dos caps d’estat se rescontraràn lo mes de mai que ven. L’endrech de la reünion es encara de determinar.
 
Jeongeun prepausèt dijòus passat una reünion a Trump e quitament ofriguèt d’arrestar son programa nuclear de missils e de començar la desnuclearizacion per tal d’entamenar de negociacions. L’anóncia la faguèt lo cap de l’ofici de la seguretat de la Corèa del Sud, que donèt a Trump una letra que Gim Jeongeun li aviá balhada al començament de la setmana.
 
Lo president estatsunidenc considèra qu’es “un grand progrès” que lo govèrn de la Corèa del Nòrd parle de “desnuclearizacion” e non solament de gelar son programa nuclear. Totun, Trump crei que las sancions economicas contra la Corèa del Nòrd devon contunhar fins que i aja un acòrdi.
 
L’anóncia arriba après un an de tensions de portada mondiala entre los dos païses davant los divèrses assages de missils realizats per Pyeongyang, e de menaças d’emplegar la fòrça nucleara per s’atacar.
 
Sembla que la tension a baissat en seguida del recent raprochament entre las doas Corèas, qu’en genièr tornèron prene lo dialòg après plusors annadas de silenci.

 

Kim Jong Un talked about denuclearization with the South Korean Representatives, not just a freeze. Also, no missile testing by North Korea during this period of time. Great progress being made but sanctions will remain until an agreement is reached. Meeting being planned!

— Donald J. Trump (@realDonaldTrump) 9 de març de 2018