Diluns, 26 de març de 2018, 03h00 Cultura,Societat
Gasconha
> Armanhac
> Lomanha
Qu’escrivó mei de vint òbras sus Lomanha e sus Occitània tota
Lo 17 de març, a l’atge de 89 ans, un istorian de valor que’s morí a Montpelhièr. Andrieu Dupuy, vadut en 1928 a Lavit de Lomanha, qu’èra un amorós de Gasconha e de la cultura occitana.
Qu’escrivó mei de vint òbras suu son país e sus Occitània tota coma ua Petite encyclopédie occitane, en 1974. Que descrivó l’istòria e la civilizacion tradicionau de Lomanha dens Les cahiers de la Lomagne (14 libets) e mantuas monografias de vilatges o vilas coma Sent Clar, Miradors… Que fondèc l’associacion La Lomagne mémoire pour demain (Lomanha, memòria entà deman), e, en 1996, ua maison d’edicion, Lo libre occitan, entà editar los grans autors com Joan Bodon o Max Roqueta. Que’ns deisha quauques biografias, totas d’òmis de Lomanha: Pierre Fermat, l’engèni de las matematicas e un òmi de Bèumont de Lomanha, un escrivan occitan mesconegut, Paul Sabathé, o enqüèra un artista-pintre lomanhòu J. Vital-Lacaze, tots dus vaduts a Tornacopa. Que perpausèc tanben libes mei engatjats coma La contestation gasconne lors de la création du département de Tarn-et-Garonne (2008). La sua obra màger que demora l’Histoire chronologique de la civilisation occitane, arrecomandada per los universitaris de pertot.
Bibliografia principau:
— Portraits et croquis occitans, Saint-Christol, 1978.
— Encyclopédie occitane, edicions Slatkine, 1989.
— J.-G. Dastros: poète gascon, Saint-Christol, 1993.
— Histoire chronologique de la civilisation occitane (en 3 tòmes), edicions Champion/Slatkine, 1998.
— Pierre de Fermat, La Lomagne, Mémoire pour Demain, 2002
— Lavit de Lomagne, des origines à nos jours, 2003
— Dictionnaire biographique de la Lomagne, Cahiers de la Lomagne, 2007
— Une autre France, La Lomagne mémoire pour demain, 2015
Anne-Pierre Darrées
Comentaris
30 de març 23.20h
Nostalgia, nostalgia, eras annadas 70, eths libes coma eths de Dupuy que nos èran plan utiles ! Que nos balhavan vam !
Adiu Andriu !
Valoriza aqueste comentari:
0
0
26 de març 21.24h
Mei promierei lecturas occitanistas!
Capeu bas, Mèstre!
Valoriza aqueste comentari:
11
0
26 de març 19.49h
A! la "Petite encyclopédie occitane" de Dupuy! La prestèri e me la tornèron pas. Espèri que los que l'an al mens l'an consultada e que son pas complètament pècs sus l'occitan e Occitània.
Una capelada pel sénher Dupuy!
Valoriza aqueste comentari:
5
0
26 de març 11.24h
Unes se trufaràn benlèu de sas publicacions subre l'istòria e la civilizacion occitanas. Verat es que non èra un professional de la question. Mas los professionals que se'n trufaràn, per prepausar d'aplèits "plan coma cal e non risibles" subre los meteisses subjèctes, actualizats, neutres e rigoroses, ont son ?
Valoriza aqueste comentari:
16
0
26 de març 08.41h
Un grand òme e una òbra bèla indispensabla, per saber qui sèm.
Valoriza aqueste comentari:
16
0
1
Comenta
Lo comentari es estat mandat corrèctament
5 comentaris
En cargar
5 comentaris
Mandar
