Los establiments escolars Calandreta son d'escòlas ont l'ensenhament se fa en occitan de faiçon immersiva. La primièra Calandreta foguèt creada a Pau (Bearn) en 1979.

 

A l'ora d'ara (donadas 2018) i a 65 escòlas e 4 collègis e 1 licèu 4000 escolans escolarizats.
 

Las Calandretas son d'escòlas laïcas. Lo metòde practicat es lo de l'immersion lingüistica precòça. L'ensenhament dispensat seguís los programas de l'Educacion estatala francesa. La pedagogia i es activa (inspirada de las tecnicas Freinet) per acompanhar l'enfant cap a l'autonomia, lo partatge e la ciutadinitat.

 

Calandreta dispausa d'un establiment d'ensenhament superior occitan APRENE (plaçat a Besièrs) ont son formats los professors d'escòla Calandreta. APRENE es reconegut per l'Educacion estatala francesa e afiliat a l'ISLRF (Institut Superior de las Lengas de la Republica Francesa).