Bandièra01 capçalera  1180x150: Botiga

Opinion

De la dificultat de demorar pacifista... sus Facebook

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Ma murralha de Facebook es meslèu militanta. Los imatges de gatòts e los “medishòts” (ensai de revirada deu mot selfy) i prenguen pas una plaça de las granas. Pr’amor deu perfiu de mons ciberamics, s’i tròban sustot aficats sorra-borra bilhets de propaganda a favor de l’occitan, de l’Esperanto, deu veganisme, de l’independéncia de Catalonha, de l’anarquisme, deu revengut universau, e informacions sus Iran o d’un grop de cultura jusiva o deus ucrainians de Tolosa.
 
Après una debuta d’estiu on superavan largament los tèxtes en portugués relatius a la copa deu monde de butabala, lo conflicte israelopalestinian se vengó convidar sobtament au mes de julhet e comencè de concurrenciar lo d’Ucraïna abans de nos negar d’informacions, de cridas e de propaganda.
 
De l’aute costat, l’espotiment de l’avion deu vòl MH17 prengó tanben una plaça de las bravas pr’amor deu juste esglàs que causè. Dens la setmana que seguiscó lo crash e l’acús tant per tant amagat de la diplomacia americana, informacions mès hòlas se crotzèn dambe un ritme sostengut e la frèbe be gahè la telaranha coma rarament per abans.
 
Ende hèr lo punt sus l’ahar un còp la tension caduda, cau saber que duas versions s’opausan:
 
— la deus Occidentaus qu’imputan la responsabilitat aus rebèlles de l’arribèra deu Donetz sostenguts per Rússia. Dison que seré estat un missile sòu-aire tirat dempuèi lo parçan qu’aucupan. Balhan coma pròva un enregistrament entre dus rebelles que comentan l’espotida per telefòne lo jorn medish.
 
— la deus Russes qu’acusan un avion caçaire ucrainian que seré estat apercebut e notat per contrarotlaires aerians espanhòus, en tot muishar que l’enregistrament mencionat mès haut seré un montatge (mès de duas votzes diferentas, sus Internèt se pòt legir la data de fabricacion que seré la velha e non pas lo medish dia)
 
E doncas podètz imaginar una murralha de hialat sociau assautada per imatge de dròlles de la listra de Ghaza* mòrts e sangplapats (deus quaus cau notar uns imatges de Siria reciclats), pròvas de mau verificar que lo Hamas se servís deus dròlles coma de paveses umans (tanben filmòts de Siria reciclats), de manifestacions d’Israelians a Tel-Aviv contra l’ataca de la lor armada, de rebelles ucrainians que panan l’aur suus còses inanimats de la victimas de l’avion, articles qu’explican que los rebelles an pas panat l’aur de las victimas, mès sustot la palma que se’n portè lo Vladimir Potin, l’estela de l’estiu dambe caricaturas de totas que’u mòstra en Hitler, en ors, en caçaire d’avions, en Hannibal Lecter, etc …
 
Cau díser qu’i avó duas maishantas setmanas quan las violéncia graficas e verbalas e l’òdi atenhón los soms.
 
Adara, la dificultat d’estar pacifista s’exprimís dens son esplendor tota. Au moment de commemorar la mòrt deu gran Jaurés, totis son mès pacifistas que non pas los autes. Mès quan un conflicte navèth se perfila, los pacifistas son qualificats de “behelants”.
 
Vaquí doncas, ende estar clar, çò que pòt estar la posicion pacifista suus conflictes màgers de l’estiu 2015:
 
— Ucraïna es l’enjòc d’una rivalitat entre dus imperialisme, lo deu vesin rus e lo deus Estats Units, qu’es pas brica lo vesin mès que s’es entitolat solet “gendarma deu Monde”. Nosautes sèm dens l’esfèra d’influéncia d’aquestes e totis los mèdias son ligats a la difusion de propaganda a lor favor. Lo ròtle deus Occidentaus es doncas estujat (finançament deu Maidan, ajuda militara, manòbras au ras deu territòri rus) e demòra pas sonque l’escenari deus Ucrainians contra los Russes. Aquò minora pas l’imperialisme rus, mès renvia los dus camps a egalitat.
 
— La guèrra dens la listra de Ghaza* es pas una luta de Jusius contra Arabis, mès de pòbles contra los poders. Los bellicistas de cada costat (Hamas, govèrn actuau israelian, Bibi Netaniahu purmèr) son aliats objectius e an besonh de l’aute ende guardar la man sus son pòble pròpri. La paur e la violéncia es un motor de manipulacion deus ciutadans. Totun, sus la telaranha, l’accion #JewsAndArabsRefuseToBeEnemies coneish una escaduda interessanta e es la pròva que totis seguissen pas lo ritme guerrièr au pas comptat. Es una galeria de fòtos que muishan monde de las duas comunautats dens una actitud amistosa, a còp amorosa (quitament dus òmis, duas hemnas o cobles mesclats).
 
Ténguer aquesta linha es pas simpla. L’òdi e la paur son de bon semiar e sovent los bellicistas son pas sonque personas normalas que floishan davant l’argumentari bellicós. L’engana mès tarribla estó la de la fòto deu rebelle ucrainian que tenguèva a la man un orset de peluisha au miei deus brigalhs de l’avion malaisian en la muishar aus fotografes. La legenda disèva: “Un terrorista mòstra fièrament lo trofèu de l’avion qu’an hèit càder.”
 
Quan se vei lo filme sancèr, la mentida es tot simplament monstruosa: lo tipe depausa lo joguet delicatament on l’avèva pres, se tomba lo capèth, hè un signe de la crotz e una petite pregària en memòria de las victimas de l’accident.
 
Se tenguètz un tau discors tròp de d’ora, es a díser quan los esperits son encara cauds, vos podètz hèr aperar, coma jo, per totis los lèds noms: a l’encòp sosteng de dictator, fascista ucrainian, comunista, terrorista, tanvau sionista o antisemita se cau.
 
Lo problèma veng de çò que lo monde plan sovent es pas dens l’analisi mès dens la peleja e la polemica. Pensan que cau causir un costat e ensajar d’esglachar l’aute biaish de pensar per mots utilizats coma carris d’assaut.
 
La volontat de patz passa purmèr per se medish. Quan lo monde a reglat sons problèmas d’agressivitat e s’i escad de’s mestrejar, lavetz que pòt escotar l’aute e començar de’u comprénguer e sustot de véser que tot es pas sancèrament blanc o néguer (Evidéncia sovent enonciada mès pas jamès practicada).
 
Que cau tamben ac voler. Es una auta istòria.
 
 
 
_____
* M’estimi mès d’escríver Ghaza dambe una “h” pr’amor qu’es la transliteracion de la letra غ que’s prononça coma una “r” parisenca e que s’apèra ghaïn

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jig Mimbasta
23.

#22 Beròi dit. Que’m desavieni totun dab la "cauda" e sonque…
La resulta n’ei pas la medisha, justament. Se la societat evolueish, per exemple cap a mei d'umanisme, qu’ei precisament pr'amor de la libertat d'expression. A trucas de parlar la ideas que hèn camin, senon en çò deus gavidaires, au mensh hens l’opinion. Pr’amor d’aquò los Estats totalitaris que s’estiman mei lo “Ta gueule” que non pas lo “Cause toujours”.
Quan exprimim librament çò qui pénsam qu'am tostemps l'impression que ns'escotan pas pro, mes que cau tanben préner en compte lo fèit que d'autes expreimeishen ideas lhèu contràrias. Qu'ac apèran debat public, tensions, etc. Ua societau shens nada tension qu’ei ua societat fossilizada, çò qui ei precisament l’ideau e lo prètzhèit deus totalitarismes.
Quitament quan ei libra la paraula, las evolucions que costan temps pr’amor de l’inercia collectiva. Pr’aquò la democracia ne consisteish pas a encoratjar l’intolerància o lo conservatisme mei endarrerat. Leis omofòbas de las qui védem en Oganda o Russia que van hèra delà çò qui demandan las mentalitats ; qu’estupan tot debat public e que fomentan las persecucions.
Per préner un exemple lhèu mei tanhent, la situacion deu gascon qu’ei melhora gràcias au ton tribalh que n'ac seré, non militèssis pas.
La resulta n’ei pas la medisha.

  • 0
  • 0
LECLERCQ Joan-Marc
22.

#21 Aquò es una bona analisi. Soi d’acòrdi sus mantun punts, lhevat que hèi jo la diferéncia entre duas nocions que son solide ligadas e vesinas, mès de desseparar.

La definicion deu mot « democrata » per un govèrn vòu díser « que preng en compte la volontat deu pòble », vosautes pensatz a la nocion « que deisha parlar las opinions alternativas », çò que, ende jo, es diferent. Es la diferéncia entre « libertat d’expression » e « democracia ». Èi plan notat totun que hasèvatz la destria entre los dus dens las expressions « Ta gueule » e « Cause toujours ».

Doncas, en resumit, que la situacion sia mès bona en França que non pas en Russia ES EVIDENT (Oof, l’èi dit!), mès quan disi que los govèrns occidentaus son pas mès democratics, voli díser que la resulta es la medisha, sonque an un aute estile de muselar las opinions altenativas. Coma ac ditz lo Noam Chomsky: « La propaganda es au govèrn democratic çò que la malhuca es a la dictatura ».

Lo Potin sortís de l’escòla deu KGB, cau pas comptar dambe eth ende lo metòde doç, lo Hollande veng de l’ENA, l’estile es diferent! Aquò que hè bèra pausa que los governants occidentaus an comprés que la repression vesedera èra contra-productiva e que los mèdias plan conta-rotlat jogavan lo ròtle d’una polícia secreta.

Solide vau milhor estar a casa e pas entenut que non pas en preson e non pas entenut tampauc. Soi d’acòrd aquò dessùs. Lavetz perqué militi ? Militi ende la lenga occitana ende que las lengas de mon país sian reconegudas e oficializadas, çò qu’es hèra milhor hèit en Federacion de Russia, estranhament. Tatarstan existís sus la mapa de la Federacion de Russia, sa lenga i es co-oficiala, mentre podètz cercar la dralha deu Bascoat o de Bearn sus la mapa de la Republica Francesa, n’i a pas.

Perqué vòti ? Vòti pas.

L’exemple deu maridatge ende totis es un bon exemple. La populacion de Russia es pas prèsta d’acceptar una tala lei e las mentalitats i son encara pauc evoluïdas sus aquò. L’omofobia es presenta e fòrta. Se Potin hasèva passar una tala lei, seré solide a l’encontre de sa populacion e doncas pas democratic. Es estranh d’escríver aquò, mès la lei deu maridatge ende totis en França, qu’es una causa fòrça bona, seré benlèu pas passada per referendum. N’ac sabi pas. Es una question d’evolucion de l’uman mès qu’una question de democracia.

En resumit : tiò, vau milhor víver en França end’estar pas embestiat per la polícia e poder s’exprimir, mès la resulta es la medisha.

  • 1
  • 0
Jig Mimbasta
21.

Per estar ua republica de barbozas que n’i hè pas bon càder au marigòt, a l’ora qui pàrlam França n’ei pas ua autocracia triomfanta e arroganta com lo regim deu Potin. En França los assassins que deven tuar a l’amagat, en sosmac, e ne s’arrecaptan pas lo poder dinc a l’an de la gratèra. Ne vòlen pas estar coneishuts e ne s’amuishan pas lo piet nud a caçar lo tigre mentre que la gentalha e plaudin. Tot aquò que poderé cambiar se daubuns e prenossin lo poder, mes n’ei pas enqüèra lo cas.

Que disi sovent la diferéncia enter totalitarisme e democracia qu’ei la medisha qu’enter « Ta gueule ! » e « Cause toujours ». Mes au mensh dab lo « Cause toujours » la contèsta que’s pòt totun exprimir e mei obtiéner resultats — autament, perqué militas tu ? E coma militant, quin se hè qui siis pas a Caiena, o sus un lheit d’espitau a desagregà’t tròç e tròç, hart de polònium ? Los contestaires que’s pòden vueitar l’escudèla e har lo passacarrèra shens arrecotir au sot ; los opausants politics que’s pòden organizar en partits e presentà’s a las eleccions ; los govèrns que caden ; l’arròda vira. La causida e l’auhèrta politicas qu’existeishen — autament, perqué vòtas tu ?
Non i a pas cap golag on enviin los cantaires/jornalistas/rivaus qui desplasen au rei/tsar/president-dictator-generau. Ne hèn pas empach au tribalh de las ONG (o senon, que’m cau explicar perqué aquestas s’i cèrcan ua endòsta). Be sajan de hicar camaligas a la premsa alternativa, mes non s’i escaden pas guaire e aquera que contunha de tribalhar. Non vòtan pas leis omofòbas entà plàser au marge mei fascita deu país — au contra, que’us daishan maridà’s. Non daishan pas los medishs fascistas qu’agredin impunidament los omosexuaus o las minoritats a tot canton.
Lo poder b’ei temptat de designar grops o minoritats a la vindicta populara, e discriminar o secutar que hèn (especiaument contra los rroma) ; pr’aquò, la societat civiu que se n’encuenta e que’n debat.

Per mantuas rasons atau, jos cada aspècte, que pensi la situacion societau e politica a l’ora d’ara qu’ei melhora en França que non pas en Russia, e per tot lo mesprètz que m’inspira la nosta classa politica, daishar enténer que Russia e França son equivalentas que seré autant abusiu com d’idealizar lo primtemps ucraïnés en bèth cargar Russia de tots los pecats deu mond.

  • 0
  • 0
manjacostel Muret
20.

Soi completament d'accòrdi ambe l'article.
A l'occitan d'esquèrra russofòba (coma n'i a fòrça ) coma al jornalista liure( coma n'ia pas gaire) li pareis pas de creire que Poutine volga pas los missiles de l'OTAN al ras de la Russia ( coma n'i a jà dins Pòlonha o Estonia ), dins aquel pais qu'es lo còr del monde slava . Sovenèm nos de la crisi de Cuba! De que n'en dison los jornalistas del monde liure d'aquelses missiles . E ben n'en dison ren levat que Poutine es un dangièr ... Doble jutjament doble format messorga e mesprès.
Imagina que deman los bèlgas o los soissas romans demandan lo restacament a Francia , los ausiran bramar de contentament los franchimands e sai que los occitans russofòbas . Sovenètz vos encara del grand Charles que cridèt : Quebec Liure". Imagina una minuta Poutina dire a Karkov visca l'Ukraina liura e russa.
Doncas es completament normal que los russes d'Ukraïna vòlgan venir russes e los ukraïnans polonèses polonés, quora l'avenidor vira a la guèrra est oest. Que ièu compreni pas per de que joga aital lo Poutine al cat e a la mirga, al luòc d'ajudar francament Donètz , Louansk, mas encara Karkov et Odessa e la Transnistria.
Los americans espèravan una brava guèrra entre los fraires slaves coma dins Iogoslavia.Es a mand d'arribar.
Levat que se los americans volian la democracia de pertot ( encara qu'a Kiev que s'agis d'un còp d'estat) alara l' Arabia Saodita o serià (una democracia)dempuèi mai d'un sègle.
Pr'aquò tota aquela banda d'oligarcas m'agradan pas mai qu'a vos, valon pas la cartocha mas los nòstres o valon pas melhor.

Nota : an totjorn pas trobat lo mejan de far parlar la boita negra del boing, curios non alara que n'èran segurs de tot, una ora aprèp la casuda de l'avion?

  • 0
  • 2
Joan-Marc LECLERCQ
19.

#18 Soi plan d'acòrdi dambe çò que dises, sustot a la debuta.
Per l'idèia que lo poder rus pòt "eliminar" opausaires, es plan conegut, mès pensi que Robert Boulin, Coluche, David Kelly, François de Grossouvre, Jean Hedern-Allier, Pierre Beregovoy, Jean de Broglie, lo jutge Borrel, Fernando Pereira an de qué parlar dambe la paura Anna Politkòvskaia au paradís.

  • 3
  • 0

Escriu un comentari sus aqueste article