Bandièra01 1180x150: Comuna de Tolosa

Politica lingüistica de Jornalet

La còla de Jornalet revisam e corregissèm la màger part dels articles. Ansin vos garentissèm un occitan de bona qualitat per l’usatge social e familial e per l’ensenhament. Cada article revisat aplica la nòrma classica, fixada per Loís Alibèrt e lo Conselh de la Lenga Occitana (CLO), e mesa en òbra dins los trabalhs del Conselh Lingüistic del Congrès Permanent per la Lenga Occitana.
 
1. Articles d’informacion
 
1a. Los articles d’informacion, non signats, son en occitan estandard general, segon la nòrma classica Alibèrt-CLO (tanben o son las etiquetas, títols e tèxtes divèrses de l’arquitectura del sit web).
 
1b. Los articles d’informacion, signats per un autor, son:
 
— Siá en occitan estandard, pluricentric, amb la possibilitat d’adaptacions dialectalas moderadas, segon la nòrma classica Alibèrt-CLO.
 
— Siá en occitan pus local, segon la nòrma classica Alibèrt-CLO. Nos reservam lo drech d’estandardizar los articles redigits dins una lenga tròp incertana o tròp inaccessibla.
 
 
2. Articles d’opinion (blògs) e dessenhs
 
2a. Los articles d’opinion e los dessenhs umoristics, conselham que sián en occitan estandard pluricentric, amb la possibilitat d’adaptacions dialectalas moderadas, segon la nòrma classica Alibèrt-CLO. Ofrissèm un servici de correccion e d’estandardizacion als autors qu’o demandan.
 
2b. Tanben acceptam d’articles d’opinion e de dessenhs umoristics non revisats e non confòrmes a la nòrma classica Alibèrt-CLO. Nos reservam lo drech de corregir e d’estandardizar los tèxtes redigits dins una lenga tròp incertana o tròp inaccessibla.
 
2c. Los tèxtes que recebèm en grafia mistralenca, en grafia bonaudiana e en grafia de l’Escòla dau Pò, los publicam segon la nòrma classica Alibèrt-CLO.
 
2d. Publicam totjorn en occitan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.